Վերջին շրջանում աթլետիկայի դերն ու նշանակությունը  գնահատող մարզասերներին ուրախացնում է գյումրեցի միջնավազորդ  Երվանդ Մկրտչյանը: Նա նախընտրում է 1500 մետր վազքատարածությունը և հաջողությունների է հասնում:

Վաստակավոր մարզիչ Գրիգոր Բարսեղյանի սանը անցյալ տարի դարձավ համաշխարհային ուսանողական խաղերի բրոնզե մեդալակիր: Այս մրցաշրջանի մեկնարկը նրա համար հանդիսացավ  Ստամբուլի մարզասրահում անցկացված Բալկանյան երկրների  ձմեռային առաջնությունը: Երվանդը ցույց տվեց 3, 45. 55 ժամանակ, գրավեց առաջին տեղը և հաղթող ճանաչվեց: Մի քանի օր անց մեր աթլետը իր ունակությունները դրսևորեց Սերբիայի մայրաքաղաք Բելգրադում տեղի ունեցած << Belgrade Indoor Meeting 2024 >>  անվանումով միջազգային մրցումներում: Նա գերազանցեց սպասելիքները՝ նոր ուղղում մտցնելով հանրապետական ռեկորդների ցանկում / 3, 38. 12 /:

- Երվանդի ցույց տված արդյունքը  աննախադեպ հաջողություն է մեզանում, -  թեմայի շուրջ զրույցում  ասաց ֆիզկուլտուրային մայր բուհի ցիկլիկ մարզաձևերի ամբիոնի դոցենտ, գիտությունների թեկնածու, աթլետիկայի մարզիչ Էրիկ Մարտիրոսյանը: - Նախ, որ վազորդի անձնական մարզիչ, փորձառու  Գրիգոր Բարսեղյանը  լավ գիտե իր գործն ու անելիքը: Այդ մասնագետը հոգատար է իր սանի նկատմամբ և հետևողական, նպատակային աշխատանքներ է կատարում:

Պատահական չէ վերջին նվաճումը, որի շնորհիվ Երվանդը լրացրեց միջազգային կարգի սպորտի վարպետի նորման: Ինչ խոսք, գոհացնող արդյունքների հեղինակը ինքը ՝ աթլետն է,  ով արդեն ունի միջազգային մրցումների մասնակցության անհրաժեշտ չափի փորձ: Բնածին օժտված այդ մարզիկը  մրցաձևին անհրաժեշտ որակներով է ելնում պայքարի. դիմացկունություն, արագաշարժություն . . .  Կարևոր է հատկապես և այն, որ նա կարողանում է մրցումներում կատարել մարզչի մշակած  տակտիկական հանձնարարականները: Ուստի ենթադրում եմ, որ մեր մարզիկը սպասելիքները կարդարացնի նաև առաջիկա մրցումներում, որոնց  դերը չափազանց  մեծ  է ընթացիկ ՝ օլիմպիական տարում:

Պետք է հավատալ, որ մարտի 1 – 3 –ը Գլազգոյի մարզասրահում կայանալիք աշխարհի ձմեռային առաջնությանը մասնակցելու ուղեգիր արդեն նվաճած  Երվանդ Մկրտչյանը կզարգացնի  հաջողությունը և կնվաճի Փարիզի օլիմպիական խաղերում հանդես գալու իրավունք: Խնդիրը բարդ է, պետք է ցույց տալ պահանջվող ժամանակը՝  3, 33. 50:  Անձամբ ինքս հավատում եմ Երվանդի ունակություններին, բայց ցանկությունը իրականություն դարձնելու համար պետք է վազորդի համար ստեղծել  մարզումային – նախապատրաստական բոլոր պայմանները, - այսպես իր խոսքն ավարտեց Էրիկ Մարտիրոսյանը: