Միլանի  Ice Skating Arena-ում, գեղասահքի սպորտային զույգերի ազատ ծրագրում, Հայաստանը ներկայացնող  Կարինա Ակոպովա -  Նիկիտա Ռախմանին «դուետը», ոգևորող մեկնարկից հետո չկարողացավ լիովին դրսևորել իր վարպետությունը: Երկու ծրագրերի միավորների ընդհանուր գումարով / 180,66 միավոր / մեր  զույգը գրավեց 14-րդ տեղը։

«Միլիոնատերը  ետնախորշից» ֆիլմի երաժշտության ներքո Կարինան երկու անգամ սխալվեց, ինչը ազդեց  գնահատականի վրա: Գուցե պատկերը այլ լիներ, եթե հայրենասեր մեր աղջիկը կրկին «ճախրեր» երգահան Արա Գևորգյանի հոգեթավ  որևէ ստեղծագործության հնչյունների ուղեկցությամբ:

Ամեն բանից անկախ, մարզաձևում Կարինա Ակոպովա -  Նիկիտա Ռախմանին սպորտային զույգի արդյունքը մեզանում լավագույնն է օլիմպիական խաղերի  պատմությունում:

Առաջին եռյակում տեղ գտան հաջորդաբար Ճապոնիայի,  Վրաստանի և  Գերմանիայի ներկայացուցիչները։ Ի դեպ, վերջին  զույգը հանդես եկավ «Գլադիատոր» հայտնի ֆիլմի երաժշտության ուղեկցությամբ, որտեղ բրոնզե մեդալակիր դառնալուն գուցե  նպաստեց  նաև  մեր աշխարհահռչակ  դուդուկահար  Ջիվան Գասպարյանի նվագը:

Այսպիսով Հայաստանի բոլոր հինգ օլիմպիականները ավարտեցին իրենց ելույթները Իտալիայի ձմեռային մարզահանդեսում: