Հաստատվել  է 2028թ.  օլիմպիական խաղերի ծանրամարտի  ընտրական համակարգը, որը   բազմափուլ, խիստ կանոնակարգված գործընթաց է։

Ընտրության  նոր համակարգը  լայնածավալ խորհրդակցություններից ու  համագործակցությունից հետո է հաստատել ՄՕԿ-ի գործկոմը: Այն  հիմնված է  երկարաժամկետ կայունության վրա:  

Ծանրամարտը 2028 –ի  ամառային մարզահանդեսում կներկայացվի 120 մարզիկով (60 տղամարդ, 60 կին): Նրանք կմրցեն 12 քաշային կարգերում (վեցական տղամարդ և կին )։

Ընդհանուր թվից 108 մարզիկ կընտրվի քվոտաների միջոցով (այդ թվում՝ 96-ը՝ որակավորումով, իսկ 12-ը՝ մայրցամաքային ներկայացուցչությունից), վեցը՝ որպես ընդունող երկրի ներկայացուցիչներ, և  ևս վեցը՝ համընդհանուր քվոտաների միջոցով։

Որակավորումը  կանցկացվի   2026թ. հուլիսի 27-ից՝  2028թ. մայիսի 7-ը և կներառի երկու հիմնական փուլ:  

Առաջինը կներառի  վեց խոշոր մրցաշար. 2026թ. աշխարհի առաջնություն՝  Նինգբո / Չինաստան/, առաջին և երկրորդ  որակավորման մրցաշարեր: 2027 թ. մայրցամաքային առաջնություններ, որակավորման երրորդ մրցաշար, աշխարհի առաջնություն Երևան /Հայաստան/:

Ի դեպ, Բաթումում  այս տարի նախատեսված Եվրոպայի առաջնությունը ուղեգիր չի շնորհի:

Երկրորդ փուլ. որակավորման չորրորդ և հինգերորդ  մրցաշարեր, 2028 թ. մայրցամաքային առաջնություններ և աշխարհի առաջնություն՝ Աստանա:

Հենց այս մեկնարկներով է ձևավորվելու վերջնական վարկանիշը։

Յուրաքանչյուր ծանրորդ առնվազն պետք է մասնակցի  որակավորման հինգ  մրցաշարի, ցույց տա կայուն բարձր արդյունքներ, մնա առաջատարների շարքում և պահպանի  հակադոպինգային բոլոր կանոնները:

Օլիմպիական խաղերում ծանրորդները հանդես կգան հետևյալ քաշային կարգերում.  տղամարդիկ ՝ 65 կգ, 75 կգ, 85 կգ, 95 կգ, 110 կգ, +110 կգ-ում, կանայք՝ 53 կգ, 61 կգ, 69 կգ, 77 կգ, 86 կգ և  +86 կգ: