Հունիսի 1-ին և 2-ին Մոսկվայի «Լուժնիկի» մարզահամալիրում կանցկացվի պատանի օլիմպիականների՝  թվով հինգերորդ  միջազգային ֆորումը: Այն ավանդաբար կազմակերպում է Ռուսաստանի  Դաշնության օլիմպիական կոմիտեն: 

Միջոցառմանը  կմասնակցեն 14-17 տարեկան շուրջ 270 պատանի մարզիկներ՝  Ռուսաստանի Դաշնության մարզերից, Բելառուսից, Հայաստանից, Ուզբեկստանից, Սիրիայից, Նամիբիայից, Մալիից և այլ երկրներից։

Ֆորումի նպատակն է երիտասարդ մարզիկներին   կրթել  օլիմպիական գաղափարներով, արժեքներով:  Սպորտը նպաստում է ազգերի  միջև  բարեկամության, հարգանքի, արդարության և գնահատելի այլ որակների ձեռքբերման գործին:

Միջոցառումը մասնակիցների մոտ պետք է խթանի մաքուր սպորտի ( կյանք առանց դոպինգի ) և արդար խաղի հիմնական սկզբունքների պահպանմանը:

Համաժողովին ավանդաբար ներկա են լինում բազմաթիվ անվանի մարզիկ – մարզուհիներ, չեմպիոններ:  

Մասնակից երկրների ԱՕԿ-ների ներկայացուցիչների համար կանցկացվի  ուսումնական սեմինար:

Հայաստանի ազգային օլիմպիական կոմիտեն այսօր Մոսկվա կճանապարհի մեր պատվիրակությանը, որը ղեկավարում է Երևանի օլիմպիական պետական մարզական քոլեջի մարզիչ- մանկավարժ Ալլա Պետրոսյանը: Խմբում են պատանի մարզիկներ Անգելինա Կարապետյանը, Անահիտ Միքայելյանը, Արթուր Գալուստյանը և Արթուր Բաղդասարյանը: