ՀԵՐԹԱԿԱՆ ՏՊԱՎՈՐԻՉ ՀԱՂԹԱՆԱԿԸ
Իր գերազանց պատրաստականությամբ հայ մարզասերին շարունակում է հիացնել բռնցքամարտիկ Հովհաննես Բաչկովը / 63 կգ /:
Տոկիոյի օլիմպիական ռինգում այս անգամ նրա մրցակիցն էր ուզբեկ Էլնուր Աբդուրաիմովը: Քառորդ եզրափակիչի այդ մենամարտում Հովհաննեսը կարծես յուրատեսակ ուսուցողական դաս տվեց Հայաստանի պատանի բռնցքամարտիկներին: Գյումրեցու յուրաքանչյուր գործողությունը անչափ կարևոր է մարզաձևի վերելքի ուղին բռնած յուրաքանչյուր մարզիկի համար:
Այո, Բաչկովը գործով է ապացուցում, թե ինչպիսին պետք է լինի կաշվե ձեռնոցի իսկական վարպետը: Մերձամարտում, միջին և հեռու տարածություններից նրա կատարած հարվածաշարերը, մեկ տասնյակի հասնող երկհարկանի և 2 – 3 անգամ կիրառած եռահարկ կոմբինացիոն գրոհներն իրենց հմայքով ապշեցնում, հիրավի վեհացնում են մարզասերին:
Կարծում ենք ասածը բավական է ուզբեկի նկատմամբ նրա տոնած համոզիչ հաղթանակի մասին, մանավանդ որ, մրցավարտից հետո, Էլնուր Աբդուրաիմովն ինքը գոհունակությամբ շնորհավորեց հայ վարպետին:
Ցանկանում ենք Բաչկովի կատարմամբ մեզ համար ցանկալի սցենարը տեսնել նաև ամերիկացի Կեյշոն Դևիսի հետ օգոստոսի վեցին կայանալիք կիսաեզրափակիչում:
Պատվասե‛ր գյումրեցի, շարունակիր քո ձեռնարկած յուրատեսակ խաչակրած արշավանքը օլիմպիական ռինգում: Հայ մարզասերը վարժվել է քո հաղթանակին և քեզանից ակնկալում է այն մեդալը, որին դու իսկապես արժանի ես:
