Այսօր  վոլեյբոլի ծննդյան օրն է: 1895թ. փետրվարի 9-ին ԱՄՆ –ի Մասսաչուսեթս նահանգի Հելիոկ քաղաքի ֆիզկուլտուրայի ուսուցիչ Վիլյամ Մորգանը  ստեղծել է վոլեյբոլ խաղը:

Նա ցանկանում էր հիմնել  մի մարզաձև, որը հնարավոր կլիներ անցկացնել առանց հատուկ նախապատրաստության և կահավորանքի:

Մորգանը մշակեց տասը կետից բաղկացած խաղի կանոնադրություն: Նշենք  մի քանիսը. խաղադաշտի չափը, կահավորումը, գնդակի քաշը, ցանցի բարձրությունը, հաշիվը, մարզիկների քանակը, նրանց իրավունքները, պարտականությունները, խաղի վարման պայմանները և այլն: Ցանցի բարձրությունը սահմանվեց  198 սմ., գնդակի քաշը` 340գր.,  խաղադաշտի չափսը` 7, 6 x 15,1մ.:

1896թ. նոր խաղը Սպրինգֆիլդ քաղաքում ցուցադրվեց հանդիսականներին: Հանդիպմանը ներկա պրոֆեսոր Ալֆրեդ Խոլստեդի առաջարկությամբ այն անվանվեց վոլեյբոլ,  անգլերեն` << թռչող գնդակ >> :

2021թ. հայկական վոլեյբոլը  տոնում է հիմնադրման  95-ամյակը: Մարզաձևի հանրապետական ֆեդերացիան ընթացիկ տարում  մի քանի միջոցառումներ կանցկացնի Գյումրիում: Ընտրությունը պատահական չէ, քանզի  մեր երկրի << Հայրաքաղաքում >>  է առաջին անգամ / 1926թ. / տեղի ունեցել վոլեյբոլի ցուցադրական խաղ:

Դիտարժան մարզաձև է վոլեյբոլը: Տասնամյակներ առաջ այն մեծ մասսայականություն էր վայելում Հայաստանում: Բոլոր բնակավայրերում եղել և  գործել են բացօթյա խաղադաշտեր: Տարբեր տարիքի մարդկանցով համալրված թիմերը, նաև գյուղական  բնակավայրերում, մրցել, պայքարել են թռչող գնդակով միավոր շահելու, հաղթելու համար:

Մարզաձևի ՀՀ ֆեդերացիան  հնարավորության սահմաններում պահպանում է մարզաձևը, ջանք չի խնայում այն մասսայականացնելու համար:Ավելին, իր օրացույցում տեղ է հատկացրել նաև լողափնյա և ձյան վրա մրցաձևերի համապետական և միջազգային մրցաշարերին:

Ունենք նաև լավ ավանդույթներ: Նշենք Մյունխենի օլիմպիական խաղերի / 1972թ. / արծաթե մեդալակիր Նինա Մուրադյանին, Եվրոպայի չեմպիոն Սերոբ Փլավչյանին, էլ չենք ասում ԽՍՀՄ տղամարդկանց և կանանց առաջնություններում հանդես եկած մեր թիմերի ու նաև այն մասին, որ հայրենական դպրոցի տասնյակ ներկայացուցիչներ հրավիրվել ու հիմնական գրանցում են ստացել  ԽՍՀՄ տարբեր քաղաքների ուժեղագույն  ակումբային թիմերում: Հենց  Գոռ Ալեյանը իր վարպետությունն է դրսևորել Լենինգրադում ու հիմա  Երևանում օլիմպիական հերթափոխի խաղերի մարզադպրոց է ղեկավարում:

Մարզաձևի մեր ազգային ֆեդերացիան անդամակցում է վոլեյբոլի եվրոպական և միջազգային ֆեդերացիաներին:Հավելենք, որ առաջին անգամ 1964թ. Տոկիոյի օլիմպիական խաղերում են մեդալներ վիճարկել վոլեյբոլում: