ՀԱՂԹԱԿԱՆ ՄԵԿՆԱՐԿ

11:27 - 06 Հուն, 2022

Ֆուտբոլի ազգերի լիգայի նոր մրցաշրջանի առաջին խաղը Հայաստանի հավաքականն անցկացրեց սեփական հարկի տակ:

B լիգայի առաջին խմբի անդրանիկ խաղում,  Երևանի Վազգեն Սարգսյանի անվան ստադիոնում, տանտերերը հյուրընկալեցին Հյուսիսային Իռլանդիայի ֆուտբոլիստներին:

Հանդիպումն ընդհանրապես անցավ հյուրերի տարածքային առավելությամբ: Նրանք ավելի շատ էին տիրում գնդակին և գործողություները վտանգավոր էին: Չենք կարող ասել, թե ինչ ելք կունենար մրցամարտը, եթե տանտերերը աչքի չընկնեին նվիրական խաղով: Ընդհանուր համապատկերի վրա առանձնացավ Վարազդատ Հարոյանը: Նա խաղում էր անձնուրաց և արհեստավարժին հատուկ  գործողություններով հմտորեն չեզոքացնում էր իռլանդացիների մտահղացումները: Իսկ դրանք քիչ չէին: Համենայնդեպս, մեր դարպասի ուղղությամբ հյուրերը կատարեցին 13 հարված՝ դաշտի տերերի ցուցադրած յոթի փոխարեն:

Հիշարժան է  խաղի 75 –րդ րոպեն,  երբ կիսապաշտպան Էդուարդ Սպերցյանը հեռահար և դիպուկ հարվածով գրավեց մրցակցի դարպասը ու  հաղթանակ պարգևեց մեր հավաքականին:

Մրցաշարի սկիզբը հուսադրող է: Մեկնարկի հաջողությունը ոգևորիչ է և տղաների մարտական ոգին կարծում ենք  չի դավաճանի նաև արտագնա խաղերում:

Հունիսի ութին Հայաստանի ընտրանին Շոտլանդիայում ուժերը կչափի տեղի թիմի հետ:

Այլ նորություններ