Գովելի ավանդույթ է ստեղծել ըմբշամարտի միջազգային ֆեդերացիան: Կազմակերպությունը հիմնել է  << Ամսվա լավագույն մարզիկ >>  անվանակարգը: Հերթական ՝ մայիս ամսի հունահռոմեական ոճի լավագույն մարզիկ  է  ճանաչվել Հայաստանի պատանեկան հավաքականի անդամ, էջմիածինցի  Ջանես Նազարյանը:

Հեռակապով զրուցեցինք Ջանեսի անձնական մարզիչ Գոռ Աբգարյանի հետ. << Սանս  Արտիմեդ գյուղի բնակիչ է, 11- րդ դասարանի աշակերտ է, - ասաց մարզիչը: - Նպատակ ունի դպրոցն ավարտելուց հետո դառնալ ֆիզկուլտուրային մայր բուհի ուսանող:

Նախորդ ամսին Բուլղարիայի Սամոկով քաղաքում դարձավ Եվրոպայի պատանիների չեմպիոն.  հաջորդաբար ծնկի բերեց Ռումինիայի՝  6:0, Մոլդովայի՝  8:0, Ռուսաստանի՝  9:0, Իտալիայի՝  10:0 և վերջապես Վրաստանի՝ 4:0 պատվիրակներին ու ընդհանուր՝  37 : 0 ջախջախիչ  հաշվով  հաղթանակներ գրանցեց ու կանգնեց  պատվո պատվանդանի վերին աստիճանին:

Մեր մարզաձևում Ջանեսը ուզում է նմանվել իր կուռքին: Նա հայաստանցի աշխարհի առաջին չեմպիոն,  էջմիածինցի Ռուբիկ Կարապետյանն է: Իհարկե, նրա գոտեմարտերին ականատես չի եղել.  նույնիսկ՝  ծնված էլ չի եղել: Բայց մարզիչներիս պատմածով տպավորվել է շնորհալի պատանին: Գործնական մարզումների ժամանակ հաճախ ենք ցուցադրել, նմանակումներ արել ընկեր Ռուբիկի կատարած գցումներին, անկրկնելի գլորումներին, չորեքթաթ վիճակում մրցագորգին << սոսնձվելու >> հատկանիշներին և այլն:   

Ի դեպ, Ջանեսն անցյալ տարի կրկնեց իր կուռքի նվաճումը՝ դառնալով աշխարհի պատանիների չեմպիոն . . . >>  :

Բավարարվենք այսքանով և սպասենք  շնորհաշատ ըմբիշի գալիք  հաջողություններին:

Լուսանկարում՝  չեմպիոնն ու մարզիչը: