Հյուսիսային Մակեդոնիայի Սկոպյե քաղաքում անցկացվեց  հունահռոմեական ըմբշամարտի Եվրոպայի պատանեկան առաջնությունը / մինչև  17 տարեկաններ /:

Սպասելիքները գերազանցեց Հայաստանի հավաքականը: Ավագ մարզիչ Գագիկ Խաչատրյանի  սաները առաջին տեղը գրավեցին  թիմային պայքարում:

Վստահ գործողություններով առավելապես աչքի ընկան Մարատ Աճեմյանը / 51 կգ / և Հայկ Մանուկյանը / 60 կգ /: Նրանք գրոհային ոճով գոտեմարտեցին, հաղթեցին իրենց մրցակիցներին, գրավեցին առաջին տեղը և պարգևատրվեցին չեմպիոնի ոսկե  մեդալով:

Արծաթե մեդալի արժանացան  Մարտին Մանջիկյանը / 48 կգ / և Ջանես Նազարյանը / 65 կգ /, իսկ Արարատ Ավետիսյանը / 45 կգ / կանգնեց պատվո պատվանդանի երրորդ աստիճանին ու ստացավ  բրոնզե  պարգև:

Հերթը ազատ ոճայիններինն է: