Գլազգոյի մարզասրահում վաղը կսկսվի աթլետիկայի  աշխարհի ձմեռային առաջնությունը: Այդ խոշոր մարզական իրադարձությանը  մասնակցելու իրավունք է   նվաճել   28 –ամյա Երվանդ Մկրտչյանը: Նա իր ունակությունները կդրսևորի 1500մ. վազքատարածությունում: Խնդիրը բարդ է.  պետք է նվաճել Փարիզի օլիմպիական խաղերում հանդես գալու իրավունք: Դրա համար մեր վազորդը 1500 մ.  տարածությունը պետք է հաղթահարի առնվազն 3, 33. 50 ժամանակում:

Վաստակավոր մարզիչ Գրիգոր Բարսեղյանի սանը անցյալ տարվա համաշխարհային ուսանողական խաղերի բրոնզե մեդալակիր է: Այս մրցաշրջանում   Ստամբուլի մարզասրահում անցկացված Բալկանյան երկրների  ձմեռային առաջնությունում Երվանդը ցույց է տվել  3, 44. 55 արդյունք, գրավել է  առաջին տեղը և հաղթող ճանաչվել:

Դրանից հետո գյումրեցին  իր բարձր կարգը հաստատել է նաև  Սերբիայի մայրաքաղաք Բելգրադում տեղի ունեցած Belgrade Indoor Meeting 2024 անվանումով միջազգային մրցաշարում: Նա նոր ուղղում  է մտցրել հանրապետական ռեկորդների ցանկում / 3, 38. 12 /:

Ի դեպ, Գլազգոյի ստուգատեսին մասնակցելու իրավունք են ստացել աշխարհի 32  ուժեղագույն միջնավազորդները:

Երվանդ Մկրտչյանն  արդեն մրցավայրում է:  Նրա հետ է աթլետիկայի ՀՀ ֆեդերացիայի նախագահ, հեռացատկում Եվրոպայի անգերազանցելի ռեկորդակիր Ռոբերտ Էմմիյանը:

Հավատանք, որ գարնան առաջին օրվա երեկոյան վազքահերթը  ցանկալի արդյունքով կնշանավորվի  Երվանդի համար: