Ֆուտբոլի Եվրոպայի 2024թ. առաջնության  ընտրական փուլի նախավերջին  տուրում, նոյեմբերի 18 -ին,  Հայաստանի հավաքականը սեփական հարկի տակ հյուրընկալեց  Ուելսի ընտրանուն:

Հանրապետական մարզադաշտի տրիբունաները ծանրաբեռնած ֆուտբոլասերները ականատես եղան  հիրավի լարված և անզիջում պայքարի:

Խաղային առումով տանտերերը, ենթադրում ենք, արդարացրին սպասելիքները: Գրանցվեց  1 : 1 հաշիվը, բայց . . . երկու գոլն էլ հեղինակեցին դաշտի տերերը:

Չափազանց գեղեցիկ գոլի հեղինակ դարձավ Լուկաս Սելարայանը: Դեռևս հանդիպման հինգերորդ րոպեին նա, մրցակիցների համար անակնկալ, կտրուկ շրջադարձով գնդակը մխրճեց ուելսցիների դարպասը:

Ընդմիջման գնալուց առաջ, լրացուցիչ ժամանակում, նվիրական խաղով աչքի ընկած Նաիր Տիկնիզյանը, դեպի սեփական դարպասը սլացող գնդակի ճանապարհը փակելու նպատակով,  ցատկեց ու . . .  դարձավ  ինքնագոլի հեղինակ: Փաստի համար ծանր, արցունքոտ ապրումներ ունեցավ Նաիրը:

Երկրորդ խաղակեսում դաշտում տնօրինում էին տանտերերը: Գրագետ, մամլիչ խաղաոճով, մերոնք բարձրահասակ մրցակիցներին զրկեցին վտանգավոր գործողություններ կիրառելուց: Փոխարենը, երևի թե 10 - 15 անգամ գոլային հարվածներ կատարեցին: Բայց գնդակը մեր տղաների կամքին չէր ենթարկվում և սուրալով անցնում էր դարպասաձողերի կողքով:

Վաղը ՝ նոյեմբերի 21 –ին, ՀՀ  ազգային հավաքականը Խորվաթիայում, ընտրականի ծրագրով, կմրցի տեղի թիմի հետ: