Նախապատրաստական վերջին աշխատանքներն են տարվում Հայաստանի մինչև 22 տարեկան բռնցքամարտիկների հավաքականի հետ:

Կարեն Աղամալյանի գլխավորած մարզչական կազմը մեծ ուշադրությամբ հետևում է նախապես կազմած ծրագրով նաև մարզիկների անհատական որակների բարելավմանը:

Երևանում հոկտեմբերի 26 –ին սկսված ուսումնամարզական վերջին հավաքը կավարտվի նոյեմբերի ութին, որից երկու օր հետո պատվիրակությունը կուղևորվի Չեռնոգորիա՝ Եվրոպայի առաջնություն:

- Բուդվա քաղաքում  անցկացվեց նաև Եվրոպայի բռնցքամարտի գավաթի առաջին խաղարկությունը: Այնպես է ստացվում , որ 20 –օրյա ընդմիջումից հետո կրկին մեկնելու ենք Չեռնոգորիայի այդ քաղաքը, - զրույցի ժամանակ ասաց Կարեն Աղամալյանը: - Այնտեղ մրցումային պայմանները բավարար են  և կարծում եմ, որ մեր հերթափոխը լավ մասնակցություն կունենա ու  տղաները քայլ կկատարեն դեպի ազգային հավաքական:

Փորձությանը կմասնակցեն գյումրեցիներ  Ռուդոլֆ Գարբոյանը / ՀՄՄ, 51 կգ /, նրա եղբայր Ռուբեն Գարբոյանը / ՀՄՄ, 54 կգ /, Երևանի դինամոյականներ  Ռուսլան Ասլիկյանը / 57 կգ / , Էրիկ Իսրայելյանը / 60 կգ /, վանաձորցի Արթուր Շահբազյանը / ԲԿՄԱ, 63, 5 կգ /, Գյումրիի քաղաքային ՄԴ –ի սան  Արարատ Հարությունյանը / 67 կգ /,   Նարեկ Զաքարյանը / Մարտունի, ԲԿՄԱ, 71 կգ  /, երևանցի Ռաֆայել Հովհաննիսյանը / ԲԿՄԱ, 86 կգ / գյումրեցի Հենրիկ Ճիղրիկյանը / ԲԿՄԱ, 92 կգ / ,երևանցի գերծանրքաշային Հովհաննես Փափազյանը / Նորք – Մարաշ / և աղջիկներ, երևանցի Էլլիդա Քոչարյանը / Վլ. Ենգիբարյանի անվան ՄԴ / ու  արմավիրցի Սոնա Հարությունյանը / 63 , 5 կգ /:

Հայաստանի բռնցքամարտիկների համար կարևոր ստուգատես կհանդիսանա հունվարի 15 –ին Երևանում  մեկնարկելիք հանրապետական առաջնությունը: Դրա արդյունքներով կկազմենք ազգային գլխավոր թիմը, որը կմասնակցի  փետրվարին՝  Միլանում , ապա մայիսին ՝ Թաիլանդում  նշանակված Փարիզի օլիմպիական  խաղերի ուղեգրերի համար մղվող վարկանիշային մրցաշարերին: