Ատլանտյան օվկիանոսի ափին, Կանաչ հրվանդան թերակղզում է գտնվում Սենեգալի մայրաքաղաք  Դաքարը: Այնտեղ  2026թ.  հոկտեմբերի 31-ից`  նոյեմբերի 13-ը, կհամախմբվեն  աշխարհի  պատանի  մարզիկ  - մարզուհիները:  Դաքարից բացի, երկրի  նաև Դիամնիադիո և Սալի քաղաքներում  կանցկացվեն պատանեկան ամառային չորրորդ  օլիմպիական խաղերը:

Համաշխարհային այդ միջոցառումը  առաջին օլիմպիական իրադարձությունն է աֆրիկյան մայրցամաքում: Ստուգատեսը մեծ ոգևորություն է առաջացրել  բնակչության շրջանում: Այդ առթիվ Դաքարում անցկացվում է մարզական հնգօրյա փառատոն, որին մասնակցում են հազարավոր մարդիկ: Նպատակն է ծանոթացնել օլիմպիզմի գաղափարներին, իրազեկել ֆիզիկական ակտիվության արժեքների մասին:

ՄՕԿ-ի  << Դաքար -  2026  >> -ի համակարգող հանձնաժողովի նախագահ Քիրսթի Քովենթրին նշել է, որ Դաքարը մեծ ոգևորությամբ է նախապատրաստվում երեք տարի հետո անցկացվելիք խաղերին և անհամբերությամբ է սպասում դրա մեկնարկին:

Փառատոնի ծրագիրը մշակել են երիտասարդները, ՄՕԿ –ը,  Սենեգալի կառավարությունը և երկրի օլիմպիական կոմիտեն:

Ծրագիրը ներառում է  տարբեր մարզական միջոցառումներ, վարպետության դասեր, ներկայացումներ, համերգներ, արվեստի փողոցային ցուցադրություններ, որտեղ գրաֆիտի նկարիչները կստեղծեն օլիմպիական արժեքներին նվիրված  որմնանկարներ և այլն: