Ընթացիկ մրցաշրջանը արգասաբեր է  հունահռոմեական ոճի ըմբիշ  Մալխաս Ամոյանի համար: Նա դարձավ Եվրոպայի չեմպիոն,  աշխարհի երրորդ մրցանակակիր, իսկ երեկ Իսպանիայի Պոնտեվեդրա քաղաքում նվաճեց  մինչև 23 տարեկան ըմբիշների  աշխարհի առաջնության հաղթողի կոչումը:

Հաջողություններն  առավելապես  գոհացնող են այն բանի համար, որ երևանցին ընթացիկ մրցաշրջանում փոխել, ավելի բարձր ՝ իր համար անսովոր  քաշային կարգ է տեղափոխվել ու հաճելիորեն զարմացնում  է հաղթանակներով:

Դժվարին պայքարում է նա միավորներ վաստակում: Բանն այն է, որ մրցակիցներն  ավելորդ կիլոգրամներ բեռնաթափելով են մտնում ասպարեզ , իսկ մեր վարպետը  << քաշ է ավելացնում >> : Այդ պարագայում հաղթելը հիրավի հերոսություն է : Եռանդուն գործողություններով ու հաղթական քայլերով Մալխասը հաստատվում է նոր ՝ 77 քաշային կարգում:

Խոսենք փաստերով:  Հենց մեկնարկում  մրցեց իրանցի Մոհամադ Ռեզա Մոխթարիի հետ: Գոտեմարտն ավարտվեց 1 : 1 հաշվով: Բայց հաղթանակը տրվեց հայաստանցուն,  քանզի նա առաջինը  մրցավարից նկատողություն ստացավ: Արդեն լիովին հասկանալի է դառնում թե ինչպիսի լարված ու դժվարին պայքար է մղել մեր ըմբիշը:

1/ 8 եզրափակիչում  Մալխասը հաղթել է մեքսիկացի  Էմանուել Կաստրոյին / 3 : 0 /, 1 / 4 –ում ՝ ղըրղզ Ակիլբեկ Տալանբեկովին  /  2 : 1 /, կիսաեզրափակիչում ՝ ճապոնացի Նաո Կասակային / 9 : 5 /, իսկ եզրափակիչում ՝  մոլդավացի Ալեքսանդր Գուտոյին  / 7 : 2 /:

Հակիրճ անդրադառնանք ճապոնացու հետ կայացած հանդիպմանը: Առաջին կեսում հաղթեց  մրցակիցը ՝ 5 : 0: Բայց իրականությունը  կարծես չմտահգեց Ամոյանին: Նա ընդմիջումից հետո գործի դրեց իր հնարքների հարուստ զինանոցը, բազմաբովանդակ գրոհներով  ինը միավոր շահեց, ոչ մի միավոր չկորցրեց  և հաղթեց 9 : 5 հաշվով: Պետք է զարմանալ և հիանալ.  որպիսի բարոյակամային հատկանիշներ և անկոտրում կամք ունի Մալխաս Ամոյանը:

Աշխարհի  չեմպիոնը  լավագույն որակներով հիշեցնում է իր անվանի ակումբակից, մրցագորգի արքա, անկրկնելի Բենուր Փաշայանին: Դինամոյական այդ մեծությունից ենք  առաջին անգամ լսել պատանի Մալխասի մասին, որ  մեզանում աճում է նոր ծագող աստղ:

Իսկ մենք, ինչպես  մասնագետներն են նշում ,  ցանկանում ենք , որ Մալխասը   նպատակային մարզումներով զարգացնի, հզորացնի  մկանախմբերը և դրանց հաշվին անհրաժեշտ կիլոգրամներով  ավելացնի  անձնական քաշը:

Իսպանիայից արծաթե պարգևով տուն կվերադառնա  մեր մեկ այլ շնորհալի ըմբիշ՝  Գևորգ Թադևոսյանը / 87 կգ /: Նա ոսկու համար մղված գոտեմարտը  միավորների փոքր տարբերությամբ  / 4 : 7 /  տանուլ տվեց հունգար Իշտվան Տակաչին:

Պատվանդանի երրորդ աստիճանին կանգնեց Հրաչյա Պողոսյանը / 63 կգ /: Ի դեպ, բրոնզե մեդալի համար այսօր մրցագորգ կելնի նաև Սահակ Հովհաննիսյանը / 67 կգ /:

ՀՀ վաստակավոր մարզիչ, հավաքականի գլխավոր մարզիչ  Արմեն Բաբալարյանը, նրա օգնականները, ըմբիշների անձնական մարզիչները  նպատակային աշխատանքով լավ մարզավիճակի են հասցրել  իրենց սաներին, որոնք գոհացնող մրցելույթներ ունեցան պաշտոնական  հերթական ստուգատեսում:

Հուսադրող ելույթները հուշում են, որ տղաները  կարող  ուժ են և մեր երկիրը պատվով կներկայացնեն Փարիզի օլիմպիական խաղերում: