ՎԵՐՋԻՆ ՓՈՒԼԸ ՝ ԹԲԻԼԻՍԻՈՒՄ
Անգլիայի Լիվերպուլ քաղաքում հոկտեմբերի 27 –ին կմեկնարկի սպորտային մարմնամարզության աշխարհի առաջնությունը:
Մասնակիցների կազմում մեծ թվով հեղինակություններ կլինեն, որովհետև հայտավորվելու իրավունք ունեն միայն համապատասխան որակավորում ունեցող մարզիկները:
Հայաստանից հանդես կգան հինգ վարպետներ: Հավաքականի գլխավոր մարզիչ Հակոբ Սերոբյանը մրցավար կուղեկցի անվանիներ Արթուր Դավթյանին, Վահագն Դավթյանին, Հարություն Մերդինյանին, շնորհալի երիտասարդներ Արթուր Ավետիսյանին և Գագիկ Խաչիկյանին։ Նրանք երեկ մեկնել են Թբիլիսի, որտեղ կանցկացնեն 21 –օրյա ուսումնամարզական հավաք:
Գլխավոր մարզիչը զրույցի ժամանակ ասաց, որ թբիլիսյան պարապմունքներին մասնակից են դարձրել նաև խոստումնալից Համլետ Մանուկյանին:
Մարզասերները լիվերպուլյան ասպարեզում կտեսնեն Արթուր Դավթյանին / հենացատկ /, Վահագն Դավթյանին, Արթուր Ավետիսյանին/ երկուսն էլ ՝ օղակներ /, Հարություն Մերդինյանին / նժույգթափեր / և բազմամարտում ՝ Գագիկ Խաչիկյանին:
