Ավստրալիայի Քվինսլենդ նահանգի Բրիսբեն քաղաքի  խորհուրդը պաշտոնական հայտ կներկայացնի ՄՕԿ՝  2032թ. ամառային օլիմպիական խաղերն անցկացնելու համար: Այդ երկրի  ԱՕԿ –ի ղեկավար Ջոն Քոութսն ասել է,  դա չի նշանակում, որ Բրիսբենն արդեն կդառնա օլիմպիական մայրաքաղաք: Անհրաժեշտ է շարունակել տարածաշրջանի ենթակառուցվածքների բարելավման և հետագա նախապատրաստական  աշխատանքները: Ամեն բան պարզ կդառնա առաջիկա հուլիսի 20 – 21 –ը նախատեսված միջազգային օլիմպիական կոմիտեի  նստաշրջանում:

Բրիսբենն առայժմ  միակ հավակնորդն է և ՄՕԿ-ի գործկոմը  փետրվարի 25-ին կայացած նիստում, այն անվանել է   գերակա տարբերակ: 

Մարզահանդեսն անցկացնելու հարցում հետաքրքրված են  Դոհայի, Բուդապեշտի  և Գերմանիայի Ռեյն-Ռուր տարածաշրջանի իշխանությունները :

Ստուգատեսի   իրավունքի համար պայքարի  շարունակման  հաջորդ քայլը կլինի մրցութային փաստաթղթերի և պաշտոնական դիմումի ներկայացումը՝ մինչև ապրիլի 7-ը:

Ի դեպ, դեմ  քվեարկած միակ մարդը  Ավստրալիայի կանաչների կուսակցության անդամ  Ջոնաթան Շրին է: Նրա կարծիքով, լայնամասշտաբ ծրագրի իրականացումը կարող է բացասաբար ազդել Քվինսլենդի նահանգի տնտեսության վրա:

Հաղթելու դեպքում  Ավստրալիան երրորդ անգամ կհյուրընկալի օլիմպիական խաղեր: Առաջինն անցկացվել է Մելբուռնում՝ 1956թ.  իսկ երկրորդը ՝ Սիդնեյում ՝ 2000թ.:

2000թ․  հաջողությամբ  անցկացված մարզահանդեսից  հետո հասարակությունն աջակցում  է նոր նախագծին։