Կորոնավիրուսի համավարակի պատճառով   շարունակվում են  ճշգրտումները  միջազգային մարզական ֆեդերացիաներում։ Ամենուրեք   փոփոխություններ  են կատարում  մրցումների և  պաշտոնական միջոցառումների ժամանակացույցում։ 

Թենիսի միջազգային ֆեդերացիան  / ITF /  որոշել է  Դևիսի  և ֆեդերացիայի գավաթների ընթացիկ  խաղարկության եզրափակիչները, որոնք պետք է անցկացվեին  համապատասխանաբար Մադրիդում / նոյեմբերի 23-29-ը/ և Բուդապեշտում  / ապրիլի 14-19-ը /  անցկացնել հաջորդ տարի: Եկող մրցաշրջանում կկայանան նաև  նշած մրցաշարերի  նախնական փուլերի հանդիպումները։

Անչափ դժվար   է եղել նման որոշում կայացնելը, քանզի խոշոր մրցաշարերը  ռիսկային են  մասնակիցների առողջության և անվտանգության առումով։ Կայացած  որոշումներով   պարզություն է մտցվել   մարզիկների, ազգային ասոցիացիաների  ծրագրերում: 

Կորոնավիրուսի շարունակական սպառնալիքի պատճառով, ձիասպորտի միջազգային ֆեդերացիայի  / FEI / գլխավոր համաժողովը, որը նշանակված էր  նոյեմբերին՝ Յոհանեսբուրգում, կանցկացվի առցանց տարբերակով:

Նույն ձևաչափով  կարող են  տեղի ունենալ նաև նոյեմբերին Աբու – Դաբիում նախատեսված առագաստանավային սպորտի միջազգային ֆեդերացիայի  / WS / ընտրությունները։

Հարցի վերաբերյալ վերջնական որոշումը կկայացվի օգոստոսի 1-ին, սակայն ֆեդերացիայի անդամների ճնշող մեծամասնությունը կողմ է  էլեկտրոնային քվեարկություն անցկացնելու գաղափարին։