Բուլղարիայի Սամոկով քաղաքում ավարտվեց Եվրոպայի հունահռոմեական ըմբշամարտի մինչև 17 տարեկանների առաջնությունը:

Մեր թիմի համար նույն սցենարով անցան մրցումների նախավերջին և վերջին օրերի եզրափակիչները, որոնց արդյունքում գրանցվեցին երկուական ոսկե և արծաթե մեդալ: Արդեն հայտնի է, որ առաջինը չեմպիոն և փոխչեմպիոն դարձան Վահե Հովեյանը / 80 կգ /  և Զավեն Մեժլումյանը /  65 կգ /: Հաջորդ օրը մեր Ջանես Նազարյանը / 71 կգ / եզրափակիչում  հաղթեց վրացի Ռամազ Բասիլիային և նվաճեց չեմպիոնի կոչումը:

Անչափ գնահատելի է Ջանեսի անցած ճանապարհը դեպի չեմպիոնություն, որտեղ  նա հաջորդաբար ծնկի բերեց Ռումինիայի՝  6:0, Մոլդովայի՝  8:0, Ռուսաստանի՝  9:0, Իտալիայի՝  10:0 և վերջապես Վրաստանի՝ 4:0 պատվիրակներին ու ընդհանուր՝  37 : 0 ջախջախիչ  հաշվով  հաղթանակներ գրանցեց ու կանգնեց  պատվո պատվանդանի վերին աստիճանին:  

Կեցցես,  Ջանես, այդպես շարունակիր քո հաղթարշավը: Իհարկե, արժանին պետք է մատուցել  նաև էջմիածինցի նորընծա չեմպիոնի անձնական մարզիչ Գոռ Աբգարյանին:

Նույն օրը, մեկ այլ եզրափակիչում, մեր  Ալեքսան Շալջյանը / 92 կգ / բավարարվեց արծաթե մեդալով: Գյումրեցի փոխչեմպիոնի անձնական մարզիչն է Խոսրով Մելիքյանը:

ՀՀ վաստակավոր մարզիչ Գագիկ Խաչատրյանի  գլխավորությամբ  մեր պատանի ըմբիշները ընդհանուր առմամբ նվաճեցին յոթ  մեդալ՝  երկուական ոսկե, արծաթե և երեք  բրոնզե:

Թիմային հաշվարկով  Հայաստանի  պատանեկանը 145 միավորով զբաղեցրեց երկրորդ տեղը: Առաջինը ճանաչվեց Ռուսաստանի  /  170 միավոր /, իսկ երրորդը ՝  Ադրբեջանի թիմը / 118 միավոր  /:

Եվրոպայի առաջնությունը ցույց տվեց, որ մեզանում հուսալի հերթափոխ է աճում: Նկատի ունենք  ըմբիշներին, և, անշուշտ,  հեղինակավոր մասնագետների բարի ավանդույթները շարունակող  երիտասարդ ու շնորհալի մարզիչներին: