Եվրոպայի օլիմպիական կոմիտեի  (ԵՕԿ) գործկոմը  հաստատել է Ստամբուլում  2027թ.  կայանալիք  աշխարհամասի չորրորդ  խաղերի մրցումային ծրագիրը: Այն  մշակվել է ստուգատեսի   կազմկոմիտեի և համապատասխան միջազգային ու  եվրոպական մարզական  ֆեդերացիաների հետ սերտ համագործակցությամբ։

Եվրոպական խաղերում կներկայացվի ընդհանուր առմամբ 26 մարզաձև, այդ թվում՝ LA28 օլիմպիական ծրագրին համապատասխանող 22  մարզաձև։

Միջոցառումը  առաջարկում է   որակավորման լայն հնարավորություններ:

Թիավարությունը (լողափնյա սպրինտ), ծանրամարտը և սքվոշը  իրենց նորամուտը  կկատարեն Ստամբուլում, իսկ սքվոշը առաջին անգամ կներկայացվի  նաև LA28-ում։

Մարմնամարզությունը, վոլեյբոլը և ըմբշամարտը կվերադառնան ծրագիր՝ Կրակով-Մալոպոլսկա 2023-ի խաղերում բացակայելուց  հետո։

ԵՕԿ համակարգող հանձնաժողովի նախագահ Միհայ Կովալիուն ասել է. «Ստամբուլ 2027-ը կարևոր հանգրվան կլինի Լոս Անջելես 2028-ի ճանապարհին։

Ծրագիրը արտացոլում է մեր համագործակցությունը միջազգային և եվրոպական ֆեդերացիաների հետ»։

Ստամբուլ 2027-ի գործադիր տնօրեն, պրոֆեսոր Վելի Օզան Չակիրն ասել է. «Ստամբուլ 2027-ի  խաղերը կցուցադրեն եվրոպական սպորտի ուժն ու բազմազանությունը։ ԵՕԿ-ի և ֆեդերացիաների հետ սերտ համագործակցությամբ մշակել ենք մի ծրագիր, որն արտացոլում է ինչպես մարզական գերազանցությունը, այնպես էլ մեր քաղաքի տեսլականը։ Անհամբեր սպասում ենք եվրոպացի  մարզիկներին և երկրպագուներին»։

Մրցավայրերի վերաբերյալ լրացուցիչ մանրամասները կհրապարակվեն առաջիկայում:  

Ծրագրում ընդգրկված են հետևյալ մարզաձևերը.   3×3 բասկետբոլ, աթլետիկա (Եվրոպայի թիմային առաջնություն), բադմինթոն, բռնցքամարտ, կանոէ, սուսերամարտ, մարմնամարզություն, ձյուդո, կարատե, քիքբոքսինգ, ժամանակակից հնգամարտ, մուայթայ, պադել, թիավարություն (լողափնյա սպրինտ), ռեգբի - 7,  հրաձգություն, սպորտային ժայռամագլցում, սքվոշ, սեղանի թենիս, թհեքվոնդո, եռամարտ, վոլեյբոլ, ծանրամարտ, ըմբշամարտ, նետաձգություն, լող:

Եվրոպական չորրորդ խաղերը կանցկացվեն 2027թ. հունիսի 16 -27-ը: