Հայաստանի գեղասահքի՝  Կարինա Ակոպովա - Նիկիտա Ռախմանին սպորտային զույգը   հաջող հանդես եկավ Չեխիայի մայրաքաղաք Պրահայում անցկացվող աշխարհի առաջնությունում: Ինչպես կարճ, այնպես էլ երեկ անցկացված ազատ   ծրագրում, մեր երկյակը գրավեց ութերորդ տեղը և  ընդհանուր հաշվարկում  դարձյալ  ճանաչվեց ութերորդը:

Ազատ սահքերում  մերոնք ելույթ ունեցան  հնդկական երանգներով երաժշտության ուղեկցությամբ և  վաստակեցին  123.34 միավոր: Մրցավարները տեխնիկան գնահատեցին 63.75,  իսկ բարդությունը՝ 59.59 միավոր:

Ավելորդ չէ  նշել, որ օլիմպիական խաղերում  մեր  դուետը վերջնարդյունքում  վաստակել էր 180. 66, իսկ հիմա, աշխարհի առաջնությունում,  190.46 միավոր:

Առաջընթացն ակնհայտ է:

Տղամարդկանց մենասահքում ՀՀ պատվիրակ  Սեմյոն Դանիելյանցը չհաղթահարեց կարճ ծրագրի որակավորման փուլը։ 19-ամյա գեղասահորդը  36 մրցակիցների պայքարում  գրավեց 26-րդ տեղը: