Արդարացի  խաղի միջազգային կոմիտեն  հայտարարել է Միլան Կորտինա -  2026 ձմեռային օլիմպիական խաղերի մրցանակաբաշխության մեկնարկի մասին: Հեղինակավոր այդ կազմակերպության նպատակն է  պատվել այն մարզիկներին, ովքեր ցուցադրում են սպորտային ոգու, ազնվության և համերաշխության արտակարգ դրսևորումներ՝ աշխարհի ամենախոշոր  իրադարձությունների   ասպարեզներում:

Այս տարվա միջոցառումը   պատմական հատուկ նշանակություն ունի: Բանն այն է, որ  առաջին  մրցանակը շնորհվել է 62 տարի առաջ՝ իտալացի, բոբսլեյի լեգենդ Եվգենիո Մոնտիին՝ Ինսբրուկի 1964թ. ձմեռային օլիմպիական խաղերի ժամանակ ցուցաբերած մարզական արարքի համար:

Մրցանակաբաշխությունը Իտալիա բերելը Միլան Կորտինա 2026-ի համար խորհրդանշական «տուն վերադարձ» է Մոնտիի՝  պաշտպանած արժեքների համար։

Կազմակերպության  նախագահ Սունիլ Սաբհարվալն այդ առթիվ  ասել է. «Չկա սպորտ առանց արդարացի խաղի։ Մենք ուրախ ենք կրկին համագործակցել ՄՕԿ-ի հետ՝ «հաղթանակ՝ մեդալից այն կողմ» հասկացությունը ընդգծելու համար։ Իտալիան մեր առաջին հաղթողի ծննդավայրն է, ինչը այս խաղարկությունը դարձնում է հատկապես հուզիչ։ Մենք խրախուսում ենք բոլորին՝ գյուղի մարզիկներից մինչև տանը գտնվող երկրպագուները, օգնել մեզ բացահայտելու այն պահերը, որոնք սահմանում են իրական օլիմպիզմի ոգին»։

ՄՕԿ-ի նախագահ Քիրստի Քովենթրին նշել է. «Օլիմպիական խաղերը ոչ միայն մրցակցություն և հաղթանակ են. դրանք մարդկության և համերաշխության ոգու տոնակատարություն են: Արդարացի խաղը օլիմպիական շարժման սրտի բաբախյունն է:  Իտալիայի լեռները մեզ հիշեցնում են  Էուջենիո Մոնտիի անհավանական ժառանգությունը: Ես անհամբեր սպասում եմ տեսնելու, թե ինչպես են Միլանո Կորտինա 2026-ի մարզիկները ոգեշնչելու աշխարհը իրենց մարզական արարքով  և միմյանց նկատմամբ հարգանքով»:

Առաջադրումները պաշտոնապես  արդեն  բաց են և  հրավերներ են սպասվում ԱՕԿ – ներից, միջազգային ֆեդերացիաներից, մարզիկներից և մարզիչներից, մարզասերներից . . .  

Խաղերի ավարտից հետո միջազգային հանձնախումբը կընտրի ամենաազդեցիկ պահերը:

Արդարացի խաղի միջազգային կոմիտեն ճանաչել է  ՄՕԿ- ը: Այն 1963թ.հիմնադրել են ՅՈՒՆԵՍԿՕ-ն և միջազգային առաջատար կազմակերպությունները: Ավելի քան 60 տարի կառույցը  ծառայել է որպես սպորտային էթիկայի համաշխարհային պահապան՝  պատվելով նրանց, ովքեր ազնվությունն ու մարդկային ոգին առաջնահերթ են համարում ցանկացած գնով հաղթանակից:

Հարկ է գնահատել  սպորտի հիմնարար արժեքները.  հարգանքը, բարեկամությունը` որպեսզի  արդարացի  խաղը պահպանվի ապագա սերունդների համար: