ՄՕԿ –ի գործընկեր Airbnb գործակալությունը առաջիկա ամառային օլիմպիական խաղերի երկու երկրպագուի առաջարկում է  յուրահատուկ գիշերակաց անցկացնել  խորհրդանշական  Օռսե  թանգարանում: Այնտեղ  նրանք կվայելեն << Փարիզ - 2024 >>   խաղերի բացման արարողության անզուգական տեսարանները:

Հուլիսի 26-ին  միայն երկու հյուրերը կգիշերեն թանգարանի խորհրդանշական ժամացույցի սենյակում: Այն  շքեղ ննջասենյակի է վերածել օլիմպիական ջահի դիզայներ  Մաթյո Լեհաննեն:

Ննջասենյակը գտնվում է  նախկին  երկաթուղային կայարանի հինգերորդ հարկում: Ժամացույցի սենյակից  բացվում են քաղաքի և Սենա գետի հիասքանչ տեսարանները: Այնտեղ տեղադրված է  125-ամյա պատմական ժամացույցը:

Հյուրերը նաև  մասնավոր էքսկուրսիա կանցկացնեն, կծանոթանան  թանգարանի իմպրեսիոնիստական ստեղծագործություններին, ներառյալ՝ հայտնի նկարիչներ  Մանեի,  Ռենուարի, Գոգենի,  Վան Գոգի, մյուսների: Հյուրերը նաև գուրման ընթրիք կվայելեն: Նրանց կհրամցվեն   ֆրանսիական խոհանոցի լավագույն ուտեստները:

Օրսեի թանգարանը հայտնի է իմպրեսիոնիստական արվեստի իր հարուստ հավաքածուով և ցուցադրում է 1848- 1914թթ. արևմուտքի  գեղարվեստական ստեղծագործությունները:  

Հավաքածուները ներկայացնում են արտահայտման բոլոր ձևերը. նկարչություն, ճարտարապետություն, քանդակագործություն, դեկորատիվ արվեստ և լուսանկարչություն: