ԵԿԱՎ, ՏԵՍԱՎ , ՎԵՀԱՑԱՎ
Երևան էր այցելել Եվրոպայի սուսերամարտի կոնֆեդերացիայի նախագահ, իտալացի Ջեորջիո Սկարցիոն:Նա մարզաձևի ՀՀ ֆեդերացիայի նախագահ Արմեն Գրիգորյանի ուղեկցությամբ Օլիմպավանում հյուրընկալվեց ՀԱՕԿ նախագահ Գագիկ Ծառուկյանին և գլխավոր քարտուղար Հրաչյա Ռոստոմյանին:
Հաճելի մթնոլորտում զրույց ծավալվեց հայկական սպորտի, մասնավորապես ՝ սուսերամարտի շուրջ: Նշեցին օլիմպիական խաղերի արծաթե և բրոնզե մեդալակիրներ, երևանցի Աշոտ Կարագյանի, վանաձորցի Վալենտին Չեռնիկովի, ԽՍՀՄ, Եվրոպայի, աշխարհի առաջնություններում մեդալներ նվաճած մեր մյուս հեղինակությունների մասին:
Պատվավոր հյուրը նաև ասաց, որ մարզաձևի հայկական դպրոցի հարուստ ավանդույթները կվերականգնվեն, քանզի անցած մրցաշրջանում հայ պատանի սուսերակիրները մրցանակակիր են դարձել միջազգային պաշտոնական ասպարեզներում:
ՀԱՕԿ նախագահ Գագիկ Ծառուկյանը կարևորեց Ջեորջիո Սկարցիոնի այցը մեր երկիր և նրան հուշանվերներ հանձնեց:
Իտալացին գովեստի խոսքեր ասաց Օլիմպավանի մարզումային հրաշալի պայմանների մասին, նշելով, որ այնտեղ մարզվողները, իհարկե, հաջողության կհասնեն միջազգային մրցումներում:
Սկարցիոնին ուղեկցեցին նաև մարզահամերգային համալիր, որը նրան հայտնի էր լուսանկարներով: Բայց այլ էր տպավորությունը, երբ անձամբ տեսավ կառույցի շքեղությունը՝ դրսից և ներսից: Նա վեհացավ հայկական ճարտարապետական մտքի արգասիք այդ համալիրով, խոստովանելով, որ անպայման ներկա կդառնա ՄՀՀ –ում արդեն նախատեսված սուսերամարտի միջազգային խոշոր ստուգատեսներին, որոնցից մեկն է 2026թ. անցկացվելիք Եվրոպայի առաջնությունը:
Մեզանում կկազմակերպվեն նաև մարզչական և մրցավարական դասընթացներ, միջազգային համատեղ ուսումնամարզական հավաքներ և այլ միջոցառումներ:
