ՆԱԽԱՊԱՏՐԱՍՏՎՈՒՄ ԵՆ ԹԻԱՎԱՐՆԵՐԸ
Հայաստանում թիավարություն մարզաձևը / բայդարկա, կանոէ, ակադեմիական / գրանցում ունի մայրաքաղաքում , Սևանում, Հրազդանում և Էջմիածնում: Գործող խմբերում ընդգրկված են շուրջ 200 պարապողներ: Այս մասին մեզ հետ զրույցում ասաց ՀՀ թիավարության ֆեդերացիայի նորընտիր նախագահ Տիգրան Սարգսյանը: Նա խոսեց նաև առաջիկա անելիքների մասին:
Նշած բնակավայրերում նախատեսված է անցկացնել համապետական և միջազգային մրցաշարեր: Նպատակ կա մարզաձևը լիարժեք ներկայացնել դպրոցահասակ տղաներին ու աղջիկներին, որպեսզի նրանք գիտակցեն թիավարության հմայքը, կարևորությունը մարդու առողջությունը կոփելու և ֆիզիկական ունակությունները զարգացնելու գործում: Դա կնպաստի մասսակայանացմանը և վարպետության բարձրացմանը: Բնական է, որ այդ պարագայում Հայաստանի հավաքականները ավելի բարձր արդյունքների կհասնեն արտագնա մրցումներում:
Նոր մրցաշրջանում մեր պատվիրակները կգործուղվեն տարբեր երկրներում կայանալիք պաշտոնական մրցաշարերի: Հանդիպումներ են նախատեսված Լիտվայի, Վրաստանի, Ռուսաստանի և մի քանի երկրներում նշանակված ավանդական մրցումներում: Գլխավորը Եվրոպայի առաջնությունն է, որը օլիմպիական վարկանիշային բնույթի է:
ՀՀ պաշտոնական առաջնության մասին: Այն կորոշի չեմպիոններին և մրցանակակիրներին: Նախապատրաստական հավասար պայմաններ ստեղծելու նպատակով այդ ստուգատեսը կանցկացվի ավելի ուշ: Բանն այն է, որ այժմ իսկ Սևանի համապատասխան ջրանցքը պատված է սառույցի հաստ շերտով, որը կհալվի ամիսներ հետո: Այնուհետև ջրուղի կհանվեն նավակները և թիավարները կսկսեն մասնագիտական պարապմունքները, համապատասխան մարզավիճակ ձեռք կբերեն, որպեսզի կարողանան լիովին ցուցադրել իրենց ունակությունները: Իսկ հիմա ոչ միայն Սևանի և Հրազդանի, այլ նաև Երևանի և Էջմիածնի մարզիկները, փակ մարզասրահներում, մարզիչների ղեկավարությամբ զարգացնում են իրենց ընդհանուր ֆիզիկական պատրաստականությունը:
