Փարիզի ոստիկանապետն ասել է,  որ օլիմպիական տարածքներին հարակից շենքերի  բնակիչներին անհրաժեշտ կլինի QR կոդ՝ ոստիկանական  << պատնեշները >> անցնելու համար:

Անվտանգությունը կուժեղացվի հատկապես   օլիմպիական խաղերի բացման օրը՝ 2024թ. հուլիսի 26-ին: Այդ օրը միջոցներ կձեռնարկվեն  նաև մետրոյի կայարանները  փակելու  համար, որպեսզի կանխվեն  անհարկի  միջադեպերը:

Բնակիչների համար կսահմանվի հատուկ  հսկողություն, իսկ սահմանափակ տարածքներում գտնվողները պետք է գրանցվեն, հատկապես նրանք, ովքեր  արարողությունը  կցանկանան դիտել իրենց  պատշգամբներից, պատուհաններից, տանիքներից և այլն:

Սահմանափակվելու է երթևեկությունը և անվտանգության հատուկ միջոցներ  կկիրառվեն  կարևոր հատվածներում։ Միայն նրանք, ովքեր հիմնավոր պատճառ ունեն, կկարողանան մտնել իրենց շենքերը կամ հյուրատները:  

Մարզասերների և այցելուների զգալի հոսքը պահանջում է անվտանգության ուժեղացված միջոցառումներ:Նկատի է առնված այն հանգամանքը, որ բացման արարողությունը բացօթյա է՝   Սենա գետի վրա: Ինչպես հայտնի է,  առաջին անգամ է, որ  մարզահանդեսի բացումը կլինի մարզադաշտից դուրս:

Ակնկալվում է, որ  հուլիս- օգոստոս ամիսներին մոտ 15 միլիոն մարդ ականատես կլինի ամառային  օլիմպիական և պարալիմպիկ խաղերին:

Համաշխարհային ամառային 33 –րդ մարզահանդեսի բացմանը մնացել է 227 օր: