Հնդկաստանի Մումբայ քաղաքում  այսօր կսկսվի   միջազգային օլիմպիական կոմիտեի (ՄՕԿ) գործկոմի նիստը: Այդ միջոցառմանը կհաջորդի կազմակերպության համաժողովը (հոկտեմբերի 15-17-ը):

Մումբայը Հնդկաստանի   երկրորդ քաղաքն է, որը հյուրընկալում է  ՄՕԿ-ի նիստը: Մինչ այս, 1983թ. մայրաքաղաք Նյու Դելիում է տեղի ունեցել համանուն միջոցառումը:

Հնդկաստանի մարզական ղեկավարները հույս ունեն, որ կիրականացնեն իրենց   հավակնությունը՝ 2036թ. օլիմպիական խաղերը  հյուրընկալելու համար:

Հավելենք, որ համաժողովում  լսվելու է նաև Լոս Անջելես – 2028թ. կայանալիք օլիմպիական խաղերի ծրագրում նոր մարզաձևեր ներառելու որոշումը:

Կազմկոմիտեն ցանկանում է   ավելացնել ամերիկյան ֆուտբոլի տարատեսակ դրոշ- ֆուտբոլը, կրիկետը, լակրոսը, սքվոշը և բեյսբոլը:  Դրանք նորարարական և համայնքային ուղղվածություն ունեն, խաղում են բակերում, դպրոցներում, համայնքային կենտրոններում, մարզադաշտերում, զբոսայգիներում . . .

Նախագահ Բախը գովաբանել է ծանրամարտի միջազգային ֆեդերացիային (IWF), որը  պատմության ընթացքում ամենախիստ հակադոպինգային ծրագիրն է ստեղծել:  Մինչդեռ մարզաձևը հանվել է  Լոս Անջելեսի  խաղերի նախնական   ծրագրից՝ դոպինգային, կոռուպցիոն սկանդալների և կառավարման մի շարք ձախողումների հետևանքով ու այդ պատճառով  Փարիզի ստուգատեսում  մարզիկների քվոտան գրեթե կիսով չափ կրճատվել է: