Բուլղարիայի առողջարանային  Վառնա քաղաքում վաղը կմեկնարկի FIG World Challenge Cup անվանումով սպորտային մարմնամարզության միջազգային մրցաշարը: Կմասնակցեն աշխարհի ուժեղագույն  մարմնամարզիկները: Միջազգային ֆեդերացիայի նախաձեռնությամբ անցկացվող հեղինակավոր այդ մրցումները տեղի կունենան քաղաքի մշակույթի և սպորտի պալատում:  Մրցանակների համար պայքարին կմասնակցեն 22 երկրների 100 - ից ավելի մարզիկ – մարզուհիներ:

Մրցաշրջանի չափազանց դիտարժան  ստուգատեսներին  հաջորդող Վառնայի  մրցությունը նույնպես  խոստանում է  թեժ լինել, որտեղ հանդես կգան նաև Հայաստանի երկու պատվիրակներ:  

Մեդալների համար պայքարին տոն կտա  մարզաձևի մերօրյա առաջատար, երևանցի,   Արթուր Դավթյանը, ով հաջողությամբ շարունակում է ապացուցել իր տոկունությունը: Նրա հետ թիմում ընդգրկված է նաև  Արթուր Ավետիսյանը: Մեր ներկայացուցիչներին հարթակ կուղեկցի մարզիչ  Հայկ Նազարյանը, իսկ ՀՀ հավաքականի գլխավոր մարզիչ Հակոբ Սերոբյանը  դարձյալ ընդգրկված է մրցավարական հանձնախմբում:  

Լավագույն արդյունքներ ցույց տված մարմնամարզիկները կստանան World Challenge Cup –ի  վարկանիշային միավորներ՝  յուրաքանչյուր մրցաձևի  համար: Ամենաշատ միավորներ վաստակած մարզիկները  Փարիզում կայանալիք գավաթի վերջին մրցումներից հետո կդառնան  շարքի հաղթող։

Մրցաշարը կավարտվի մայիսի 28- ին: