Նկատելի է Հայաստանի բասկետբոլի շարունակական առաջընթացը: Մարզաձևի հանրապետական ֆեդերացիան նոր, հաճելի նախաձեռնություն հանդես բերեց: Առաջատար գործող մարզիկներին արժանի փոխարինողներ պատրաստելու նպատակով  Երևան էր հրավիրվել  բասկետբոլի ավանդույթներով չափազանց հարուստ Սերբիայի հայտնի մասնագետներից մեկը ՝  Սաշա Գրուիչը: Նա հերթափոխի հետ տեսագործնական պարապմունքներ անցկացրեց:  

Տեղացի  մարզիչների հետ հյուրը  փորձի փոխանակում կատարեց, խոսեց մանկապատանեկան բասկետբոլի մարզումային առանձնահատկությունների, 10-14 տարեկան խաղացողների հմտությունները զարգացնելու ուղղությամբ տարվող աշխատանքների և այլ հարցերի մասին:

Գործնական պարապմունքների ընթացքում սերբ մարզիչը ցուցադրեց նաև պաշտպանական և հարձակողական օղակների փոխապահովման  տեխնիկատակտիկական բազմազան գործողություններ:

Սեմինարի մասնակից հայաստանցի  մասնագետները  շնորհակալություն հայտնեցին հյուրին՝  նպատակային աշխատանքի համար և նշեցին, որ Գրուիչի այցը չափազանց օգտակար էր։

Նշենք, որ Սաշա Գրուիչը ՖԻԲԱ-ի կողմից արտոնագրված մարզիչ է, ինչպես նաև սպորտի վարպետ: Նա աշխատել է Ռուսաստանի տղամարդկանց հավաքականում ՝ որպես մարզչի օգնական և գլխավորել է Մոսկվայի ԲԿՄԱ-ն։