Այսօր երեկոյան տոնական տրամադրությունն էր թևածում Կարեն Դեմիրճյանի անվան մարզահամալիրում: Տեղի ունեցավ Եվրոպայի ծանրամարտի 101 –րդ առաջնության բացման հանդիսավոր արարողությունը:

Կազմակերպիչները  լուսային էֆեկտներով հետաքրքիր ու դիտարժան բեմականացում էին պատրաստել դահլիճում ներկա գտնվողների և հեռուստադիտողների համար: Գրեթե մեկ ժամ շարունակ իրար էին հաջորդում միմյանց հետ ամուր շաղկապված խորհդանշական տեսարանները: Իսկ ամեն բան նվիրված էր Հայաստան երկրին, հիշեցնում էր մեր անցյալը ներկան ու ապագան:

Հուզիչ էր  <<  երկնքից իջնող աստվածուհին >> , որին գրկաբաց ընդունեց հայոց բերդի  խրոխտ պարախումբը:

Տպավորություն ստեղծեցին մանավանդ էկրանին ցուցադրվող մեր  մայրաքաղաքի ճարտարապետական կոթողների տեսարանները:

Ներկաները ջերմորեն արձագանքեցին հայրենական սպորտի աստղերին, նրանց թվում մեր մեծանուն ծանրորդներին, որոնք ներկայացվեցին  տեսաժապավենով:

Հապա բեմահարթակ վայրէջք կատարած խորհդանշական ինքնաթիռը, որը համալիր էր բերել մասնակիցներին ՝ իրենց երկրների դրոշներով:

Ողջույնի խոսքով հանդես եկան կազմկոմիտեի նախագահ Արայիկ Հարությունյանը և  Եվրոպայի ծանրամարտի ֆեդերացիայի նախագահ Անտոնիո Կոնֆլիտին:

Մասնակիցներին ողջունեց ՀՀ վարչապետ Նիկոլ Փաշինյանը և նա առաջնությունը հայտարարեց բացված:

Միջոցառումը եզրափակվեց ՀՀ օրհներգով: