Հայաստանում մենապայքարային մարզաձևերի զարգացման  և տարածման գործում  անուրանալի ծառայություն ունի երևանցի Լյովա Վարդանյանը: Նա ազատ ըմբշամարտից ԽՍՀՄ սպորտի վարպետ էր, վաստակավոր մարզիչ և աշխատող:

Լյովա Վարդանյանը գործուն սպորտին հրաժեշտ տալուց հետո  մարզիչ է աշխատել և նրա սաները  շարունակաբար համալրել են Հայաստանի հավաքականները:

Իր գործի նվիրյալ մասնագետը  հրավիրվել  է   հայսպորպետկոմ / ներկայիս ԿԳՄՍ /  և ղեկավարել է մենապայքարային մարզաձևերի բաժինը: Նրա գործունեության  տասնամյակների ընթացքում մեր մարզիկները խոսուն հաղթանակներ են տոնել աշխարհի, Եվրոպայի առաջնություններում , օլիմպիական խաղերում  և միջազգային մրցաշարերում: Ավաղ,  արդեն երկու տարի է, որ կյանքին հրաժեշտ է տվել շնորհալի Լյովա Վարդանյանը: Նրա հիշատակը հավերժացնելու նպատակով Երևանում  երկրորդ անգամ կազմակերպվեց  մինչև 23 տարեկան ազատ ոճի ըմբիշների մասնակցությամբ միջազգային մրցաշար: Այն անցկացվեց Կ. Դեմիրճյանի անվան ՄՀՀ –ում:

Մրցագորգ ելան  Հայաստանի, Մոլդովայի, Բելառուսի, Ռուսաստանի, Իրանի, Վրաստանի, Հնդկաստանի և Բահրեյնի շուրջ 130 պատվիրակներ:

Տանտերերից մրցանակակիր դարձան ինը ըմբիշներ, որոնցից Առաքել Մովսեսյանը (57 կգ) և Էդիկ Հարությունյանը (61 կգ) դարձան հաղթողներ: Ի դեպ, Առաքելին հանձնվեց նաև Լ. Վարդանյանի անվան  հատուկ մրցանակը, քանզի նույն քաշային կարգում է հանդես եկել անվանի մասնագետը:

Հուշամրցաշարը ուղղում մտցրեց ՀՀ երիտասարդական հավաքականի կազմում, որը կնախապատրաստվի մարտի 13-19-ը Ռումինիայի մայրաքաղաք Բուխարեստում անցկացվելիք   Եվրոպայի երիտասարդական առաջնությանը: