Ճապոնացի  հայտնի ռեժիսոր Նաոմի Կավասերի << Տոկիո - 2020- >> ֆիլմի  երկրորդ մասը կներկայացվի  Ռոտերդամի միջազգային կինոփառատոնում:

Պրեմիերան տեղի կունենա 2023թ. հունվարի 25-ից փետրվարի 5-ը`  Նիդեռլանդներում կայանալիք  փառատոնում: 

Ֆիլմը  բաղկացած է  երկու մասից: Մեկը պատկերում է խաղերը՝ մարզիկների աչքերով,  իսկ երկրորդը՝ անձնակազմի և կամավորների տեսանկյունից:

Կորոնավիրուսի համաճարակի պայմաններում անցկացված օլիմպիական խաղերի կուլիսային կադրերը, ի լրումն սպորտի և մրցումների պատմության, պատկերում են այն անսովոր  միջավայրը, որում անցկացվել  է մարզահանդեսը:

Առաջին մասի  համաշխարհային պրեմիերան կայացել է այս տարվա մայիսին՝ Կաննի հեղինակավոր կինոփառատոնում։ Ա մասը ներկայացնում է խաղերում հանդես եկած նորեկներին  և ծրագիրը համալրած նոր մարզաձևերին:

Ֆիլմը համատեղ ստեղծել  են ՄՕԿ –ը  և  կազմկոմիտեն:

Օլիմպիական խաղերին վերաբերող ավելի քան 50 լիամետրաժ  ֆիլմ կա, որոնք  կինոպատուհան են դեպի համաշխարհային սպորտի  օլիմպոս: