Ավելի քան 650 հնգամարտիկներ նամակ են  հղել  իրենց մարզաձևի միջազգային միություն (UIPM):  Նրանք կազմակերպության ղեկավարներից պահանջում են հրաժարական տալ։ 

Միությունում մտադիր են  2028թ.  ամառային  օլիմպիական խաղերի  ծրագրից հանել ձիասպորտը: Որոշումը կայացվել է Տոկիոյի ստուգատեսում Գերամանիայի հավաքականի մարզչի՝   ձիու նկատմամբ  ցույց տված դաժան վերաբերմունքի համար:

Հնգամարտիկները կարծում են, որ նման որոշումը խախտում է  մարզաձեւի դարավոր ավանդույթները և անվստահության քվե են հայտնել նախագահին և ողջ անձնակազմին: Նամակում ասվում է, որ  Բարոն Պիեռ դե Կուբերտենը ժամանակակից հնգամարտը ստեղծել է հատուկ օլիմպիական խաղերի համար՝ ցույց տալու մարզիկների բազմակողմանիությունը: Առանց մարզիկների և ազգային ֆեդերացիաների հետ խորհրդակցելու, գործկոմը նման որոշումով  ոչնչացնում է  ժամանակակից հնգամարտի 109 տարվա պատմությունը:

Մարզիկները  պահանջում են   UIPM-ի նախագահ, գերմանացի  Կլաուս Շորմանի հրաժարականը, ով պաշտոնավարում է 28 տարի: 

UIPM-ի 71-րդ համագումարը  նախատեսված է նոյեմբերի 27-28-ը, որտեղ պետք է տեղի ունենան նաև ընտրություններ: Շորմանը նախագահի պաշտոնի միակ թեկնածուն է։