Մայրաքաղաքի  << Մոսկվա >>  կինոթատրոնում հունիսի 17 –ին տեղի ունեցավ մարզաշխարհի մարդկանց հանդիպումը Հայաստանի ազգային օլիմպիական կոմիտեի նախագահ Գագիկ Ծառուկյանի հետ:

Բացման խոսքով հանդես եկավ ՀԱՕԿ գլխավոր քարտուղար Հրաչյա Ռոստոմյանը:

Նա մասնավորապես ասաց, որ  յուրաքանչյուր օլիմպիական խաղերից  առաջ  և  հետո, Հայաստանի ազգային օլիմպիական կոմիտեն հանդիպում  է մասնագետների, մարզիչների, ֆեդերացիաների ներկայացուցիչների, մարզիկների հետ:

Այս անգամ  ՀԱՕԿ –ի նախագահ պարոն Ծառուկյանը ցանկացել էր  խախտել ավանդույթը և հանդիպումը  կայացներ Տոկիոյի մարզահանդեսից հետո:

Պատճառը մեկն է. բնագավառը հեռու պահել քաղաքականությունից, մանավանդ որ մեկ – երկու օրից տեղի են ունենալու ազգային ժողովի ընտրությունները: Բայց օլիմպիականներին  քաջալերելու նպատակով, մեր մարզաշխարհի երևելիները  պարոն Ծառուկյանին խնդրել են հանդիպել:

Հրաչյա Ռոստոմյանը ներկայացրեց խոսուն փաստեր. << 1996 թվական,  Ատլանտայի օլիմպիական խաղեր: Ունեցանք մեկական ոսկի և արծաթ: 2000 թվական. Սիդնեյ. ընդամենը մեկ բրոնզ, 2004թվական, Աթենք. ձեռնունայն, առանց մեդալի, գլխիկոր վերադարձ:

Մեր նվաճումները աստիճանաբար նվազեցին, ավարտվեցին: Ահա թե ինչու մարզաշխարհի երախտավորները դիմեցին պարոն Ծառուկյանին, համոզեցին , հորդորեցին  , որ   ստանձնի օլիմպիական կոմիտեի նախագահի պաշտոնը :

Նա  եկավ  ծառայելու հայրենական  սպորտին  և  2005 թվականից  ծանրակշիռ  փաստերով ապացուցում է , որ հիրավի մեծ ավանդ է  ներդնում բնագավառի զարգացման համար :

Ծառուկյանի միջոցներով  կառուցվեցին  մարզօջախներ ` Երևանում , Գյումրիում , Սիսիանում,  Իջևանում, Հրազդանում, Աբովյանում   և այլուր:

Հաջողությունները չուշացան: Հենց հաջորդ` Պեկինի օլիմպիական խաղերում / 2008թ. / Հայաստանի պատվիրակության հաշվեկշռին գրանցվեց միանգամից վեց  << բրոնզ  >> : 2012թ. Լոնդոն՝  մեկ  արծաթե և երկու բրոնզե մեդալ: << Ռիո -2016 >> ՝ մեկ ոսկե և երեք արծաթե մեդալ:

Ոչ պաշտոնական հաշվարկով մեր օլիմպիական թիմը աստիճանաբար բարելավում է իր դիրքերը, իսկ Ռիոյում, 206  երկրների պատվիրակների մրցավեճում Հայաստանը զբաղեցրեց պատվավոր 42  –րդ հորիզոնականը . . .

ՀԱՕԿ –ը ղեկավարելու  տարիներին,պարոն Ծառուկյանի օրոք, Հայաստանի պատվիրակները պատանեկան օլիմպիական խաղերում և Եվրոպայի մարզական խաղերում նվաճել են 25 մեդալ`  ութ ոսկե, յոթ արծաթե և տասը բրոնզե պարգև:

Ընդհանրապես ավելի քան մեկուկես տասնամյակ է,  որ աշխարհի, Եվրոպայի տարիքային տարբեր խմբերի առաջնությունների, օլիմպիական և պատանեկան օլիմպիական  խաղերի, եվրոպական մարզական  խաղերի  բոլոր մրցանակակիրներին  ՀԱՕԿ –ի նախագահն  արժանացնում է դրամական խոշոր պարգևների, բնակարանների, ավտոմեքենաների և այլն:

2011թվականին նրա նախաձեռնությամբ Վլադիմիր Ենգիբարյանի անունով կոչվեց Երևանի օլիմպիական հերթափոխի պատանի բռնցքամարտիկների հանրապետական մարզադպրոցը:

Օլիմպիականների հայրենասեր ղեկավարը լուրջ աշխատանքներ է կատարում նաև Հայաստանը աշխարհին ավելի ճանաչելի դարձնելու նպատակով:

Նրա հրավերով  Հայաստան են  այցելել  ազգային օլիմպիական կոմիտեների միջազգային  ասոցիացիայի նախագահ շեյխ  Ահմադ Ալ Սաբահը, Եվրոպայի օլիմպիական կոմիտեի նախագահ Պատրիկ Հիկեն, ՄՕԿ –ի նախագահ Թոմաս Բախը:  Վերջինը  մասնակցեց Ծառուկյանի միջոցներով կերտված  ժամանակակից օլիմպիական խաղերի հայաստանցի առաջին չեմպիոն , մարմնամարզիկ    Հրանտ Շահինյանի հուշարձանի բացման հանդիսավոր արարողությանը: Հյուրերը եղան  Օլիմպավանում,  ծանոթացան մասնագիտական դահլիճների մարզումային գերժամանակակից պայմաններին: Միջազգային օլիմպիական կոմիտեի նախագահ Թոմաս Բախը խոստովանեց, որ արդեն իր համար հասկանալի են Հայաստանի մարզիկների ամենամյա հաջողությունների գաղտնիքները: Նա նաև ասաց.  պարոն Ծառուկյան, եթե  ազգային  օլիմպիական կոմիտեներում Ձեր նման հինգ նախագահ ունենայինք, ապա ՄՕԿ –ը ոչ մի հոգս  ու խնդիր չէր ունենա:

Գագիկ Ծառուկյանը իրականացրեց  իր բազում մտահղացումներից  ևս մեկը : << Հրազդան >>  մարզահամալիրի տարածքում տեղադրեց  ԽՍՀՄ չեմպիոն ու գավաթակիր   << Արարատի >>  ֆուտբոլիստների արձանախումբը: Բացման հանդիսավոր արարողությունը տեղի ունեցավ 2016թ. հոկտեմբերի 10-ին, Երևանի  << Արարատի >>  մեծ հաղթանակների 43-ամյա տարեդարձի օրը:

Այնուհետև բեմ հրավիրվեց ՀԱՕԿ նախագահ Գագիկ Ծառուկյանը: Նա ասաց, որ  մեր սպորտը դեռևս բազմաթիվ խնդիրներ ունի լուծելու : Եվ միայն համատեղ ջանքերով է հնարավոր  հաղթահարել դժվարությունները ու լուրջ  հաջողությունների  հասնել միջազգային ասպարեզներում : Սա է  գլխավոր պահանջը :

Բանախոսն  ընդգծեց մարզիչների ցածր աշխատավարձի, բազմաթիվ  մարզադպրոցների անշուք վիճակի, անորակ մարզոցների ու հանդերձանքի պակասի, հատկապես մարզերում  նոր մարզօջախներ կառուցելու անհրաժեշտության մասին և այլն:

Առայժմ ունենք շուրջ 15 օլիմպիականներ: Ամեն ինչ արվում է նրանց նախապատրաստությունը լիարժեք կազմակերպելու համար, նպատակով,  որ մերոնք հաջողության հասնեն Տոկիոյի օլիմպիական խաղերում:

Գագիկ Ծառուկյանին ուղղվեցին բազմաբնույթ հարցեր, որոնց տրվեցին  սպառիչ պատասխաններ:

Հակիրճ խոսքով հանդես եկան նաև մարզաշխարհի ներկայացուցիչները: Հայրենական սպորտի երախտավորներ, Հայաստանի 20 –րդ դարի լավագույն մարզիկ, օլիմպիական եռակի չեմպիոն Ալբերտ Ազարյանը, սուսերամարտի ֆեդերացիայի նախագահ, գիտությունների դոկտոր Արմեն Գրիգորյանը,  ֆիզկուլտուրայի և սպորտի վաստակավոր գործիչ, ՀՀ վաստակավոր մանկավարժ և մարզիչ Դերենիկ Գաբրիելյանը,  սպորտային մարմնամարզության հավաքականի գլխավոր մարզիչ Հակոբ Սերոբյանը ասացին, որ  Հայաստանի օլիմպիականները կաշխատեն խաղերում արդարացնել  սպասելիքները:

Հանդիպումն անցավ ջերմ, մարզական մթնոլորտում: