Վերջին տարիներին հաճելիորեն զարմացնում են մենապայքարային մարզաձևերի մեր բարձրքաշային մարզիկները: Խոսքը վերաբերում է նաև բռնցքամարտին:

Լեհաստանի Կելցե քաղաքում անցկացված աշխարհի երիտասարդական առաջնությունում երևանցի գերծանրքաշային  Հովհաննես Փափազյանը մեր բռնցքամարտում առաջինը դարձավ աշխարհի երիտասարդների փոխչեմպիոն:

Հավաքականի ավագ մարզիչ, վաստակավոր մարզիչ Կարեն Աղամալյանն ասաց, որ Հովհաննեսը երեք հաղթանակ տոնեց: Էստոնացի և կուբացի մրցակիցների նկատմամբ առավելության հասավ ժամանակից շուտ: Ուրիշ էր ուկրաինացու հետ մենամարտը: Այն ընթացավ չափազանց լարված պայքարում: Որոշիչը դարձավ երրորդ ռաունդը,  որտեղ Նորք –Մարաշ համայնքի մարզադպրոցի   18 –ամյա սանը տղամարդկություն դրսևորեց, առանձնացավ կամային բարձր հատկանիշներով ու պոկեց հաղթանակը: Այն որոշակի հետևանք ունեցավ, և եզրափակիչում, ուզբեկստանցու հետ հանդիպման ժամանակ, Հովհաննեսի գործողություններում  զգացնել տվեց գերհոգնածությունը:

Մեր բռնցքամարտիկը բավարարվեց աշխարհի փոխչեմպիոնի կոչումով:

Մեդալակիր կարող էր դառնալ նաև Ռուսլան Ասլիկյանը / 56 կգ /: Նա գեղեցիկ ոճով հաղթեց իսպանացի, ուկրաինացի մրցակիցներին և քառորդ եզրափակիչում մրցեց իտալացու հետ: Կողային հինգ մրցավարներից երկուսը նախապատվությունը տվել էին Ռուսլանին, երկուսը ՝ իտալացուն: Չգիտես ինչու համակարգիչը 3 : 2 հաշվով առավելություն գրանցեց մրցակցի օգտին: Բողոքարկեցինք, բայց հանձնաժողովը չընդունեց մեր հայտը , -  այդպես իր խոսքն ավարտեց Աղամալյանը:

Նշած երկու մարզիկները Երևանի պետական մարզական քոլեջի սովորողներ են: