ԿԱՐԵՎՈՐ ՈՐՈՇՈՒՄՆԵՐ

13:01 - 08 Դեկ, 2020

Միջազգային օլիմպիական կոմիտեի գործկոմի հերթական  հեռավար նիստում  ընդունվել են կարևոր որոշումներ։ Աշխատանքների ավարտից հետո ՄՕԿ –ի նախագահ Թոմաս Բախը պատասխանել է լրագրողների հարցերին։  

Նա կենտրոնացել է երեք թեմաների վրա․  Տոկիոյի օլիմպիական խաղերի նախապատրաստությանը,  Բելառուսի ԱՕԿ-ի ղեկավարության պատժին և Փարիզի ամառային օլիմպիական  խաղերի ծրագրին:

Բախը վերահաստատել է  իր  վստահությունն այն մասին, որ նույնիսկ  համաճարակի պայմաններում, Ճապոնիայի մայրաքաղաքում հաջողությամբ կանցկացվի  մարզահանդեսը։ ՄՕԿ-ը   կազմկոմիտեի և  իշխանությունների հետ  մշակում է համապատասխան կանոններ, ինչը հնարավորություն կտա անցկացնել լիարժեք միջոցառում, որին կարող են ներկա լինել նաև  օտարերկրյա մարզասերներն ու զբոսաշրջիկները: Ստուգատեսի  վերջնական ձևաչափը կհաստատվի գարնանը:

Քաղաքականությունը կրկին ներթափանցել է  սպորտ։ Հետաքննելով Բելառուսում տիրող իրավիճակը, ՄՕԿ –ը  պաշտոնապես եզրակացրել է, որ Բելառուսի ԱՕԿ –ը  երկրի մարզիկներին պատշաճորեն  չի պաշտպանել  քաղաքական խտրականությունից, ինչը հակասում է օլիմպիական խարտիային և օլիմպիական շարժման  սկզբունքներին։

ՄՕԿ-ը ժամանակավորապես արգելել է Բելառուսի ԱՕԿ-ի գործկոմի անդամներին մասնակից լինել ՄՕԿ-ի մրցաշարերին, այդ թվում՝  2021թ․  Տոկիոյում անցկացվելիք ամառային օլիմպիական խաղերին։ Դադարեցվել է  ֆինանսական աջակցությունը Բելառուսի ԱՕԿ-ին, բացառությամբ ՝ մարզիկներին տրվելիք գումարները, որոնք անմիջապես կհատակցվեն նրանց։

ՄՕԿ –ը  դիմել է միջազգային ֆեդերացիաներին, խնդրանքով , որ թույլատրեն բելառուսցի մարզիկներին մասնակցել Տոկիոյի խաղերի որակավորման մրցումներին։

Բախն անդրադարձել է Փարիզի խաղերի մրցումային  ծրագրին։  Այն էապես պետք է ճշգրտվի։ Առաջին անգամ մեդալներ կխաղարկվեն  բրեյք - դանսում ։ Սյորֆինգը, սքեյթբորդը և ժայռամագլցումը  նույնպես  իրենց  նորամուտը   կկատարեն  Ֆրանսիայում։ 

Գործկոմը որոշել է   կրճատել Փարիզի մարզահանդեսում խաղարկվող  մեդալների քանակը: Չեն հաստատվել 41 մրցաձևերի  վերաբերյալ առաջարկները։ Հակառակը, մեդալների քանակը 339-ից տասով  կրճատվել է: ՄՕԿ-ը նաև սահմանափակել է մասնակիցների ընդհանուր թիվը, այն  նվազեցնելով  մինչև  10 հազար 500 -ի , որը 600 –ով պակաս է Տոկիոյի խաղերից։

Սպասվում է, որ Փարիզում կմասնակցեն հավասար քանակով տղամարդ և կին։ Պետք է հասնել գենդերային հավասարության։

 

 

Այլ նորություններ