Կատյա Գալստյան. Ներքին համոզմունք ունեի, որ ես եմ մեկնելու Փհենչհան-2018

14:02 - 29 Հուն, 2018

Դահուկավազորդ Կատյա Գալստյանը Փհենչհան-2018-ում Հայաստանի օլիմպիական ընտանիքի անդամներից մեկն է: 25-ամյա մարզիկը երկրորդ անգամ պետք է մասնակցի ձմեռային օլիմպիական խաղերին: Նրա առաջին մեկնարկը Խաղերում եղել է 2014 թվականին, Սոչիում: 

23-րդ ձմեռային օլիմպիական խաղերում Գալստյանը հանդես է գալու 10 կմ ազատ ոճ մրցաձեւում: ՀԱՕԿ լրատվականի հետ զրույցում Կատյան պատմեց, թե ինչպես է պատրաստվում օլիմպիական խաղերին.

«Ֆինլանդիայի ուսումնամարզական հավաքից վերադառնալուց ես լավ միավորներ ունեի՝ 151 (դահուկասպորտում նվազող համակարգ է,- խմբ): Հայաստանի առաջնությունում հաղթելու շնորհիվ ինձ հաջողվեց նորից նվազեցնել միավորներս: Ներքին համոզմունք ունեի, որ Փհենչհան-2018-ի մասնակիցներից մեկն եմ լինելու: Բայց, իհարկե, այդ մասին չէի խոսում, մինչեւ ֆեդերացիան պաշտոնապես չհրապարակեր անունները:

Նախորդ օլիմպիական խաղերից մեծ փորձ եմ կուտակել: Այս անգամ ավելի լավ եմ պատրաստվել, Ֆինլանդիայում մեծ աշխատանք ենք կատարել: Այժմ էլ շարունակում եմ մարզումներս:

Բավականին լավ մարզավիճակում եմ: Կփորձեմ ավելի լավ ներկայանալ եւ բարելավել արդյունքս: Մրցանակային տեղերին չեմ հավակնում, պայքարը շատ մեծ եւ ուժեղ է: Տարիների աշխատանք է հարկավոր այդ մակարդակին հասնելու համար:

Մրցումների ժամանակ հնարավորինս փորձում եմ կենտրոնանալ եւ չմտածել այլ բաների մասին: Իհարկե մեկնարկի ժամանակ լարվածություն լինում է, բայց մրցուղում ավելի հանգիստ եմ ինձ զգում: Մրցումներից առաջ հաճախ երաժշտություն եմ լսում»,- Կատյա Գալստյանը:

Կատյան դահուկավազքով սկսել է զբաղվել 15-16 տարեկանից: Առաջին ոսկե մեդալը նվաճել է 17 տարեկանում՝ Հայաստանի առաջնությունում փոխանցումավազքից: Այն շահագրգռել է մարզիկին պայքարելու անհատական հաջողությունների համար.

«Դահուկն իմ կյանքն է, իմ առօրյան: Երկար ժամանակ է մարզվում եմ եւ դեռեւս չեմ մտածել՝ ի՞նչ պետք է անեմ կարիերայիս ավարտից հետո: Այս պահին դահուկից բացի ոչինչ չեմ տեսնում: Երբեք չեմ ծուլանում, միշտ մարտական եմ տրամադրված: Ամենապարտաճանաչ դահուկորդներից եմ, մարզումներս ոչ մի պատճառով բաց չեմ թողնում: Դրա շնորհիվ էլ որոշակի հաջողություններ եմ ունենում:

Օլիմպիական խաղերին մասնակցելը յուրաքանչյուր մարզիկի երազանքն է, իսկ հաղթանակը կամ մեդալը՝ մարզական կարիերայի գագաթնակետը»:

23-րդ ձմեռային օլիմպիական խաղերը կկայանան փետրվարի 9-25-ը, Հարավային Կորեայի Փհենչհան քաղաքում:  

Այլ նորություններ