Բաթումում ավարտվեց  Եվրոպայի  ծանրամարտի  հերթական առաջնությունը։

Հայաստանի տղամարդկանց հավաքականը  մեդալների հաշվարկով գրավեց առաջին,  իսկ կանանցը ՝  երրորդ տեղը։

Մեր թիմն ընդհանուր հաշվարկով / տղամարդկանց և կանանց արդյունքներով / նույնպես հաղթող ճանաչվեց.  ինը  ոսկե,  ութ արծաթե և յոթ  բրոնզե պարգև:

Առաջին հնգյակում են  նաև հետևյալ երկրների ընտրանիները. Բուլղարիա՝  6 +  5  + 3,  Թուրքիա՝ 4 + 3 + 9, Մեծ Բրիտանիա՝ 4  +1+2 և Ուկրաինա ՝  3 + 2  +7:

Միավորների հաշվարկով  տղամարդկանց թիմերի  առաջին վեցյակը հետևյալ տեսքն ունի.

Հայաստան՝ 567 միավոր, Բուլղարիա՝  540, Թուրքիա՝  539, Ռումինիա՝ 406, Վրաստան՝  359 և Մոլդովա՝ 340:

Կանանց պարագայում մերոնք երրորդն են .  Թուրքիա՝  442 միավոր, Ուկրաինա՝ 436, Հայաստան՝  424, Ռումինիա՝  415, Մեծ Բրիտանիա՝ 350  և Իտալիա՝ 311:

Առաջնության զարդը հանդիսացավ մեր անվանի գերծանրքաշային, գյումրեցի  Վարազդատ Լալայանը: Նա մրցեց . . . ինքն իր հետ: Հայ հերկուլեսը  պոկեց 210 կգ , հրեց 241 կգ և երկամարտի 451 կգ –ով վստահորեն գրավեց առաջին տեղն ու երրորդ անգամ հռչակվեց հին աշխարհամասի չեմպիոն:

Երկրորդը ճանաչված ռուսաստանցի  Դանիիլ Վագայցևը մեր ծանրորդին զիջեց ամբողջ 26 կիլոգրամով՝  425 կգ (192կգ +233կգ), իսկ նրա համերկրացի Թիմուր Նանիևը ( 418 կգ (191 կգ +227 կգ) կանգնեց պատվանդանի երրորդ աստիճանին:

Անշուշտ, պետք է ընդգծել նաև մեր բարձր քաշային,   դարձյալ գյումրեցի, տաղանդաշատ  Գարիկ Կարապետյանի վստահ ու համարձակ ելույթը:  Ինչպես նախորդ մրցարջանում, Բաթումում նույնպես, ահեղ մրցակիցների պայքարում, Գարիկը  հավասարը չունեցավ:

110 կգ քաշայինների  մրցությունում,  ֆիզիկականից բացի, կարևոր դեր խաղացին կամային որակները: Հոգեբանական լարված մթնոլորտում  մեր վարպետը արժանապատվորեն  իր կամքին  ենթարկեց ծանր կիլոգրամները և նվաճեց ուժեղագույնի կոչումը ( 415 կգ՝  ( 189 կգ + 226 կգ)` առաջ անցնելով Ռումինիան ներկայացրած, կուբացի  Լուիս Լաուրետից` 414 կգ (195 կգ +219 կգ): Լարվածության բարձր աստիճանի մասին է վկայում նաև <<  բրոնզե >> արդյունքը, որը պատկանում է Գարիկին ընդամենը  երեք կիոլգրամով զիջած, բուլղար Քրիստո Քրիստովին ՝   412 կգ (190 կգ +222 կգ):

Ավելորդ չենք համարում ներկայացնել նաև մեր գեղեցկադեմ չեմպիոնուհուն ՝  86 կգ քաշային  Էմմա Պողոսյանին: Նրան ոսկեզօծեցին հետևյալ կիլոգրամները.  248 կգ (107 կգ + 141 կգ):

Հայաստանի ազգային օլիմպիական կոմիտեն շնորհավոում է  չեմպիոն մեր հավաքականներին, նրանց անձանական և թիմերի մարզչական խորհուրդներին, մարզաձևի համապետական ֆեդերացիային և իհարկե մարզասերներին: