Իտալիայում  2026թ.  կայանալիք ձմեռային օլիմպիական  խաղերի  կրակը արդեն  վառվել է Հին Օլիմպիայում:

Ներկաների թվում են  եղել  Հունաստանի նախագահ Կոնստանտինոս Տասուլասը, միջազգային օլիմպիական կոմիտեի (ՄՕԿ) նախագահ Քիրսթի Քովենթրին, ՄՕԿ պատվավոր նախագահ Թոմաս Բախը և այլ պաշտոնատար անձինք:  

Ինչպես արդեն հայտնի է, անբարենպաստ եղանակի պատճառով,  արարողությունը Հին Օլիմպիայի մարզադաշտից տեղափոխվել էր հնագիտական թանգարան։ Ջահը վառելու համար օգտագործվել է պահեստային կրակ, որը բռնկվել էր արևի լույսով՝  նոյեմբերի 24-ին, Հերայի  տաճարի մոտ:

Հայտնի հույն դերասանուհի Մերի Մինան մարմնավորել է գերագույն քրմուհուն և  կրակը հանձնել է  առաջին ջահակրին՝ 2024թ. Փարիզի օլիմպիական խաղերի թիավարությունից  բրոնզե մեդալակիր Պետրոս Գայդացիսին։

Հնագիտական թանգարանում ներկաներին  դիմավորել է զինվորական պահակախումբը, ապա հույն հայտնի օպերային երգչուհի Քրիստինա Պուլիցին  կատարել է օլիմպիական օրհներգը, բարձրացվել է ՄՕԿ – ի դրոշը:

Ողջույնի խոսքով հանդես է եկել նաև ՄՕԿ նախագահ Քրիսթի Քովենթրին:   

Արարողությունը նշանավորել է  Հունաստանով ձգվող  450 ջահակիրների  իննօրյա փոխանցավազքի մեկնարկը, որը կավարտվի Աթենքում: Ապա  << Պանատինաիկոս >>  մարզադաշտում դեկտեմբերի 4-ին  ջահը կհանձնվի Միլանի և Կորտինա դ'Ամպեցցոյի կազմկոմիտեին։