ՀՅՈՒՐԵՐԸ ԵՐԵՎԱՆ ԿԺԱՄԱՆԵՆ ԱՅՍՕՐ
Աշխարհի ֆուտբոլի առաջնության եվրոպական գոտու որակավորման փուլի F խմբի Հայաստան – Պորտուգալիա հանդիպումը կսպասարկի Անգլիայի մրցավարական հանձնախումբը ՝ Էնթոնի Թեյլորի գլխավորությամբ: Նրա օգնականներն են ՝ Գարի Բեսվիկը և Ադամ Նանը։ Չորրորդ պաշտոնյան է Ռոբերտ Ջոնսը, իսկ VAR-ի պատասխանատուները՝ Փիթեր Բանքեսը և Ստյուարտ Աթվելը։
Ի դեպ, Էնթոնի Թեյլորի գլխավորած մրցավարական խումբը այս տարվա մարտին սպասարկել է Թբիլիսիում տեղի ունեցած ազգերի լիգայի անցումային փլեյ-օֆֆի Վրաստան – Հայաստան պատասխան հանդիպումը:
Նշենք, որ Հայաստան – Պորտուգալիա հանդիպումը կկայանա Հանրապետական մարզադաշտում, սեպտեմբերի վեցին: Խաղի սկիզբը՝ ժամը 20։00-ին։
Պորտուգալիայի ֆուտբոլային պատվիրակությունը Լիսաբոնից Երևան կժամանի այսօր, ուշ երեկոյան ՝ ժամը 23։30-ին։ Հյուրերը կհանգրվանեն «Seven Visions Dvin» հյուրանոցում:
