Հայաստանի մինչև 18 տարեկան բասկետբոլիստուհիները նույնպես ավարտեցին իրենց մրցավեճը Եվրոպայի առաջնության C դիվիզիոնի մրցաշարում:

Անդորրայում, մեր թիմը, ավագ մարզիչ  Սուրեն Արզումանյանի գլխավորությամբ,  գերազանցեց սպասելիքները, քանզի մրցումներում հաջողությամբ հաղթահարեց նախնական փուլերի արգելքները և մտավ եզրափակիչ: Հայրենական բասկետբոլի <<  դուստրերը >>  կամային բարձր որակներ դրսևորեցին, ջանք ու եռանդ չխնայեցին  ստուգատեսում լավագույնը ճանաչվելու համար:

Այդ  է վկայում նաև վրացուհիների հետ եզրափակիչ խաղում  գրանցված հաշվի նվազագույն տարբերությունը /  60: 63 /, որը, ավաղ, մեր թիմի օգտին չխոսեց:

Անկախ արդյունքից,  մերոնց նվաճած արծաթե մեդալներն են ձուլված են ազնիվ մետաղից, որի համար հպարտանում ենք ու շնորհավորում  մեր բասկետբոլիստուհիներին:

Նշենք, որ դիպուկությամբ կրկին աչքի ընկավ  Սեդա Գաբրիելյանը: Նա գրանցեց  դաբլ-դաբլ, վաստակեց 26 միավոր, կատարեց 21 ռեբաունդ և վեց  արդյունավետ փոխանցում:

Սեդան նաև ընդգրկվեց  առաջնության  լավագույն խաղացողների  խորհրդանշական հնգյակում: