Հայաստանի աթլետիկայի հավաքականի գլխավոր մարզիչ Գրիգոր Բարսեղյանը  19 մարզիկ – մարզուհու / 10 տղամարդ և 9 կին /  հայտ է ներկայացրել  Եվրոպայի թիմային առաջնությանը մասնակցելու համար:

Ստուգատեսը տեղի կունենա Սլովենիայի Մարիբոր քաղաքում ՝ հունիսի 24 – 25 –ը: Աշխարհագրության առումով բավականին ընդգրկուն է թիմի կազմը, որը համալրել են Երևանի, Գյումրիի, Վանաձորի, Արտաշատի և Կապանի ներկայացուցիչները:

Պատվիրակության ղեկավար, մարզաձևի ՀՀ ֆեդերացիայի նախագահ Ռոբերտ Էմմիյանի գլխավորությամբ աթլետները մրցավայր կմեկնեն հունիսի 22 – ին: Մեր հավաքականն ընդգրկված է երրորդ դիվիզիոնում: Հին աշխարհամասի 15 երկրների մարզիկների հետ մերոնք հանդես կգան նետորդների, վազորդների և ցատկորդների պայքարում:

Ուզում ենք հավատալ, որ Հայաստանի ներկայացուցիչները ուժերի անմնացորդ նվիրումով  կմասնակցեն և անմասն չեն մնա խաղարկվելիք  պարգևներից: