ՆՊԱՏԱԿԱՅԻՆ ԾՐԱԳՐՈՎ
Այս մրցաշրջանը մեր աթլետների համար հարուստ է մարզական միջոցառումներով: Այս մասին համոզվեցինք ՀՀ հավաքականի գլխավոր մարզիչ, գիտությունների թեկնածու Գրիգոր Բարսեղյանի հետ ունեցած զրույցում: Նա ասաց, որ մայիսին մերոնք կմասնակցեն երկու մրցաշարի: Նախ Արտաշատում կանցկացվի երկրի առաջնությունը: Աչքի ընկածները կմեկնեն Թուրքիայի Իզմիր մասնակցելու Բալկանյան երկրների առաջնությանը: Այդ ստուգատեսից հետո մեր երկու առաջատար մարզիկներ կմեկնեն Հռոմ ՝ Եվրոպայի առաջնություն: Կհաջորդի Ջիբրալթարում հունիսին նախատեսված Եվրոպայի փոքր երկրների առաջնությունը:
Մարզաձևի հանրապետական ֆեդերացիայի նախագահ Ռոբերտ Էմմիյանի աջակցությամբ, մինչ օլիմպիական խաղերի մեկնարկը, մեր թիմը համապատասխան ժամկետներում ուսումնամարզական երեք հավաք կանցկացնի Լիոնում ՝ Ֆրանսիայի և էլի մի քանի երկրների աթլետների հետ համատեղ:
Նախապատրաստական մարզումային – մրցումային խիտ գրաֆիկը կնպաստի մերոնց լավ մարզավիճակի հասնելու, ցանկալի արդյունքներ գրանցելու, որպեսզի ներկայացուցիչներ ունենանք Փարիզի օլիմպիական խաղերում:
Նպատակային գործընթացի մեկնարկը կտրվի վաղը ՝ ապրիլի 13 –ին: Երևան – Լիոն ուղիղ չվերթով Ֆրանսիայի նշած քաղաք՝ 14 - օրյա հավաքի կմեկնի ՀՀ հավաքականը: Թիմի գլխավոր մարզիչ, գյումրեցի Գրիգոր Բարսեղյանը, նրա գործընկերներ, վանաձորցի Գոռ Ներկարարյանը և երևանցի Գեղամ Տեր – Գրիգորյանը մարզումների կուղեկցեն վազորդներ և ցատկորդներ, գյումրեցիներ Երվանդ Մկրտչյանին, Ռազմիկ Ղազարյանին, կապանցիներ Գոռ Բեգլարյանին, Յանա Սարգսյանին, երևանցիներ Դավիթ Սարգսյանին, Գայանե Չիլոյանին, Մելինե Ադամյանին, վանաձորցի Էլլադա Ալավերդյանին և արտաշատցի Ռոման Ալեքսանյանին:
Հարգելի պատճառով արտագնա առաջին հավաքին չի մասնակցի առաջատարներից կապանցի եռացատկորդ Լևոն Աղասյանը:
