ՄԵԿՆԱՐԿԸ ՏՐՎԱԾ Է
Տարին բոլոր մարզական հևքն է թևածում մայրաքաղաքի Օլիմպավանում: Այստեղ պայմանները հրաշալի են և մարզիկների համար պարապելը հաճելի է:
Օլիմպավանի մթնոլորտը գոհացնում է նաև արտասահմանցի մարզիկներին: Այս օրերին Լեհաստանի և Էստոնիայի հունահռոմեական ոճի ըմբիշները համատեղ մարզվում են Հայաստանի հավաքականի տղաների հետ:
Նույն մրցագորգերի վրա, համապատասխան ժամային գրաֆիկով ուսումնամարզական հավաք է անցկացնում նաև ՀՀ ազատ ըմբշամարտի թիմը: Ըմբիշները նախապատրաստվում են Բուխարեստում փետրվարին անցկացվելիք Եվրոպայի առաջնություններին:
Հագեցած է նաև մեր երկրի ծանրամարտի ընտրանու առօրյան: Երկաթախաղի վարպետները նույնպես մասնակցում են ուսումնամարզական հավաքի, որն անցկացվում է Ծաղկաձորում: Նրանք նպատակ ունեն լավ հանդես գալ Սոֆիայում փետրվարի երկրորդ տասնօրյակում կայանալիք հին աշխարհամասի ստուգատեսում:
Մենապայքարային մարզաձևերից բռնցքամարտիկները պարապում են տեղերում: Նրանք իրենց ունակությունները պետք է դրսևորեն հունվարի 20 –ին մայրաքաղաքում նշանակված համապետական առաջնությունում: Աչքի ընկածներով կկազմվի հավաքական, որը պետք է մասնակցի միջազգային օլիմպիական կոմիտեի նախաձեռնած վարկանիշային միջազգային խոշոր մրցումներին: Այն կսկսվի Իտալիայում՝ փետրվարի 29 –ին:
