Դիտարժան պայքար ծավալվեց Եվրոպայի ծանրամարտի երևանյան  առաջնության տղամարդկանց  89 կգ քաշայինների պայքարում:

Տոն տվողներից մեկը մեր երկրի ներկայացուցիչ, Եվրոպայի չեմպիոն Անդրանիկ Կարապետյանն էր: Նա վստահ ու սառնասիրտ մոտեցումներով հաղթող ճանաչվեց պոկում վարժությունում: Վերջին ՝ երրորդ մոտեցմամբ էջմիածինցի վարպետը << սանձեց >>  178 կգ ծանրությունը, սահմանեց Եվրոպայի նոր ռեկորդ, մրցաձևում գրավեց առաջին տեղը և պարգևատրվեց ոսկե մեդալով:

27 – ամյա հայորդին հրումում նույնպես գլխավորում էր մրցաշարային աղյուսակը ՝ իր կամքին ենթարկելով նախ ՝ 190 կգ, ապա ՝ 196 կգ ծանրությունները: Իսկ ահա երրորդ մոտեցմամբ նրան չենթարկվեց 211 կգ – ոց ծանրաձողը / զգացնել տվեց ծնկի հին վնասվածքը / և Անդրանիկը երկամարտի 374 կգ արդյունքով դարձավ առաջնության երկրորդ մրցանակակիր ու պարգևատրվեց արծաթե մեդալով:

Անդրանիկ Կարապետյանի մրցելույթի մասին վաստակավոր մարզիչ, գյումրեցի  Արտաշես Ներսիսյանն ասաց, որ հիացած է մեր ծանրորդի օլիմպիական հանդարտությամբ,  մարտունակությամբ, իսկ կամային որակները սեփական ոսկորներից էլ ամուր են . . .  

Մարզասերներին գոհացրին նաև կանանց մրցաշարի մասնակիցներ,  76 կգ քաշայիններ  Տաթև Հակոբյանը և Էմմա Պողոսյանը:

Առավել հաջող հանդես եկավ Տաթևը: Նա երկամարտի 226 կգ / 104 կգ + 122 կգ / ցուցանիշով գրավեց երկրորդ տեղը և արժանացավ Եվրոպայի փոխչեմպիոնուհու պատվին: Հավելենք, որ նման արդյունք է նա ցույց տվել Եվրոպայի մինչև 23 տարեկանների առաջնությունում:

Զարմանալի մարտունակություն դրսևորեց Էմմա Պողոսյանը: 16 –ամյա այդ աղջիկը, կարելի է ասել, ինքն իրեն գերազանցեց: Բայց ինչպես մրցումներից հետո խոստովանել է,  նա այնքան էլ գոհ չէ  պատվաբեր հինգերորդ տեղը գրավելու համար: Բանն այն է, որ նա մարզումներում ավելի ծանր կիլոգրամներ է հաղթահարել:

Լավ է, որ նա դժգոհում է երկամարտում ցույց տված  217 կգ / 96 կգ + 121 կգ / արդյունքից, որը վկայում է նրա մարտունակության և հաջողության հասնելու ձգտման մասին:  

Այսօր երևանյան ստուգատեսի յոթերորդ օրն է: