Հայաստանի սպորտային մարմնամարզության հավաքականը գերազանցեց սպասելիքները Թուրքիայի Անթալիայում անցկացված աշխարհի երիտասարդական առաջնության  առանձին գործիքների եզրափակիչներում:

Մեր պատվիրակները  պարզապես հիացրին իրենց վստահ և կայուն  մրցելույթներով:  Մասնավորապես, Էջմիածինցի 15 –ամյա Համլետ Մանուկյանը փայլեց նժույգթափերում և օղակների վրա կատարած վարժություններով, արժանացավ մրցավարների բարձր գնահատանքին ու դարձավ աշխարհի երիտասարդների կրկնակի չեմպիոն և ոսկե մեդալակիր: 

Հմայիչ էր նաև Մամիկոն Խաչատրյանի << նժույգի սլացքը >>: Նա նույնպես արժանի է ամենաջերմ գովասանքի, քանզի Համլետի հետ բարձրացավ պատվո պատվանդան և կանգնեց փոխչեմպիոնի աստիճանին:

Մեր մեդալակիրները փաստորեն քայլում են հայրենական սպորտի նահապետ,  Հելսինկիի օլիմպիական խաղերի / 1952թ. / երկուական ոսկե և արծաթե մեդալակիր, <<  նժույգի արքա >> համարումը ստացած, մեծն Հրանտ Շահինյանի բացած չեմպիոնական արահետով: Զարմանալ ու նաև հուզվել կարելի է այն բանի համար, որ եզրափակիչ մտած աշխարհի ութ առաջատար մարզիկներից երկուսը հայաստանցի են, այն էլ ՝ լավագույնները:

Հապա  առաջնության կրկնակի չորրորդ մրցանակակիր Էրիկ Բաղդասարյանը: Նա   օղակների և  զույգափայտի վրա վարժությունների վճռական փուլում եզրափակեց առաջին քառյակները:

Հաջողության գործում, անշուշտ, չափազանց մեծ է թիմի գլխավոր մարզիչ Հակոբ Սերոբյանի և տղաներին մրցահարթակ ուղեկցած Հայկ Նազարյանի դերը:

Շնորհավորում ենք բոլոր մասնակիցներին, ասպարեզ ելածների անձնական մարզիչներին, հանրապետական ֆեդերացիային և ակնկալում նոր հաղթանակներ մեծահասակների  մարմնամարզությունում: