Լեհաստանում հունիսի 21 –ին մեկնարկող Եվրոպայի ամառային մարզական երրորդ խաղերի սկսվելուն մնացել է 112 օր:

Ստուգատեսի ծրագրում ընդգրկված  մարզաձևերի ցանկում կրկին իր տեղն է գտել թաեքվոնդոն: Բանն այն է, որ Մինսկում, 2019թ. տեղի ունեցած երկրորդ խաղերում այն չի ներառվել: Եվրոպայի օլիմպիական կոմիտեն և մարզաձևի աշխարհամասի ֆեդերացիան հաստատել են երրորդ մարզահանդեսին մասնակցող առայժմ  208  այն մարզիկ – մարզուհիների ցանկը, որոնք   համապատասխան վարկանիշային միավորներ ունեն:  Նշած թիվը կավելանա ապրիլի 8 – 9 –ին Ռումինիայում կայանալիք թաեքվոնդոյի միջազգային ընտրական  մրցաշարի արդյունքում:

Կրակովյան մրցությունում նշած մարզաձևում մեդալներ կխաղարկվեն տղամարդկանց և կանանց ութական քաշային կարգերում:

Եվրոպական երրորդ խաղերը  տեղի կունենան 2023թ. հունիսի 21-ից հուլիսի 2-ը: Սպասվում է 48 երկրների 7000 մարզիկ – մարզուհիների մասնակցություն:  Նրանք մրցումների 12 օրերի ընթացքում, Լեհաստանի 24 մարզահամալիրներում, հանդես կգան 26 մարզաձևերում, որից  19 –ում / նաև թաեքվոնդոյում /  կխաղարկվեն Փարիզի օլիմպիական խաղերի  արտոնագրեր: