Նոյեմբերի 10 –ին հայտնել էինք , որ Հնդկաստանը կընդունի  կանանց բռնցքամարտի 2023թ. աշխարհի առաջնությունը: Այդ մասին փաստաթուղթը հաստատել էին  IBA-ի նախագահ Ումար Կրեմլյովը  և BFI-ի նախագահ Աջայ Սինգհին:

Նշվել էր, որ մրցաշարի ստույգ ժամկետները կորոշվեն ավելի ուշ։ 

Եվ ահա բռնցքամարտի միջազգային ֆեդերացիան հստակեցրել է մրցումների անցկացման ժամկետները: Կանանց աշխարհի առաջնությունը տեղի կունենա  Հնդկաստանի Նյու Դելի քաղաքում 2023թ. մարտի 15-31-ը:

Մրցումները կանցկացվեն 12 քաշային կարգերում՝ 48 կգ, 50 կգ, 52 կգ, 54 կգ, 57 կգ, 60 կգ, 63 կգ, 66 կգ, 70 կգ, 75 կգ, 81 կգ և +81 կգ.

« Հնդկաստանում սիրում են  բռնցքամարտը:  Աշխարհի առաջնության  անցկացումը տեղացիներին  հիանալի հնարավորություն կընձեռի  տոնելու գեղեցիկ  հաղթանակներ և  կոգեշնչի  կանանց՝ զբաղվելու մարզաձևով:

Հնդկաստանն ու տարածաշրջանը մեծ ջանքեր են գործադրում  բռնցքամարտը զարգացնելու համար  և ես վստահ եմ, որ նրանք կկազմակերպեն անմոռանալի միջոցառում: »,- ասել է Կրեմլյովը։ 

Իր հերթին BFI-ի նախագահը  նշել է, որ  մեծ պատիվ է կրկին  հյուրընկալել կանանց ստուգատեսը: Նյու Դելիում  առաջնություն է անցկացվել   2006 և 2018թթ., իսկ 2017  - ին Գուվահաթ քաղաքը  ընդունել է  աշխարհի երիտասարդական առաջնությունը։ 

Յոթ տարվա ընթացքում երեք խոշոր առաջնությունների հյուրընկալումը ցույց է տալիս, որ Հնդկաստանում  մեծ ուշադրություն են հատկացնում ենթակառուցվածքների և հնարավորությունների ստեղծման համար: