Երևանում այսօր մեկնարկեց  սամբոյի աշխարհի պատանեկան և երիտասարդական առաջնությունը:  Նախօրյակին մարզաձևի միջազգային ֆեդերացիայի նախագահ Վասիլի Շեստակովը,  Եվրոպական ֆեդերացիայի նախագահ Սերգեյ Ելիսեևը  և այլ պաշտոնյաներ հյուրընկալվեցին Հայաստանի ազգային օլիմպիական կոմիտեի նախագահ Գագիկ Ծառուկյանին:

Շքեղաշուք Օլիմպավանը, այնտեղ տիրող մարզական մթնոլորտը առավել ջերմություն  հաղորդեցին հանդիպման մասնակիցներին:

Մարզակառույցի ընդհանուր տեսքը, ազգային խորհրդանիշերը, քանդակներն  արդեն իսկ հիացմունք պատճառեցին հյուրերին: Այդ մասին նրանք արտահայտվեցին հանդիպման սկզբից ևեթ:

Հաճելի տպավորությունը առավել թանձրացավ, երբ հյուրերը Գագիկ Ծառուկյանի ուղեկցությամբ տեսան համապատասխան մարզադահլիճները, պայմանները, գերժամանակակից մարզագույքը և, իհարկե, օժանդակ մյուս հարմարությունները:

Այս ամենը տեսնելով Վասիլի Շեստակովը ասաց հետևյալը. << Արդեն հասկանալի է, որ հայկական սպորտի վերելքին մեծապես նպաստում է այս հանգրվանը: Հիացած եմ, տպավորված՝  ընդհանուր պայմաններով, առավելապես Հայաստանի ազգային օլիմպիական կոմիտեի նախագահ պարոն Ծառուկյանի ազգանվեր գործունեությամբ:

Նրա կեցվածքն իսկ մարզական է, իսկ կատարած գործը ՝ անթերի: Ամեն բան վկայում է, որ  այդ գործիչը  սիորւմ է սպորտը, գնահատում մարզաշխարհի մարդկանց աշխատանքը: Ծառուկյանի նման անհատներով է հարստանում ու զարգանում մարզաշխարհն ընդհանրապես:

Հայոց հողում սամբո մարզաձևը սիրող ու գնահատող բարձրակարգ մասնագետներ հիրավի կան: Պատահական չեն այն խոշոր նվաճումները աշխարհի, Եվրոպայի առաջնություններում, բազում հաջողությունները միջազգային մրցաշարերում, որոնք գրանցվել են Հայաստանի մարզիկների հաշվին:

Այս ամենը գնահատելով սամբոյի միջազգային և Եվրոպական ֆեդերացիաները միաձայն Երևանն ընտրեցին որպես համաշխարհային այս ստուգատեսի մրցավայր:

Շնորհակալություն Հայաստանին մրցաշարը հյուրընկալելու, մասնակիցներին ջերմորեն դիմավորելու համար  . . . >>:

Իրեն հատուկ ջերմությամբ ու հարգանքով հյուրերին ողջունեց ՀԱՕԿ նախագահը: Նա հակիրճ խոսքով ասաց, որ հայերը ոչ  թե խոսքի, այլ գործի մարդ  են: Այս մասին հերթական անգամ կվկայի սամբոյի երևանյան ստուգատեսը:

Գագիկ Ծառուկյանը հաջող ընթացք և ավարտ մաղթեց մրցաշարին, հույս հայտնելով , որ տանտեր մարզիկ – մարզուհիները իրենց բնորոշ բարձր վարպետությամբ կնպաստեն մրցաշարի դիտարժանությանը և հաղթական գոտեմարտերով կուրախացնեն մարզասերներին:

Հանդիպման ավարտին Գագիկ Ծառուկյանը և Վասիլի Շեստակովը հուշանվերներ փոխանակեցին: