Հունահռոմեական ոճի ըմբշամարտի Հայաստանի հավաքականի գլխավոր մարզիչ է նշանակվել  միջազգային կարգի սպորտի վարպետ, ՀՀ վաստակավոր մարզիչ Արմեն Բաբալարյանը:

Նա  դասվել է մեր առաջատար վարպետների շարքը: Եղել է տարիքային տարբեր խմբերի ԽՍՀՄ առաջնությունների  բազմակի հաղթող և մրցանակակիր,  գավաթակիր  ու միջազգային բարձրագույն կարգի մրցաշարերի  ոսկե մեդալակիր:

2004 – 2005թթ. մարզել է Իրանի հավաքականը: Նրա աշխատանքի արդյունքում մարզաձևն  այդ երկրում  մեծ տարածում և առաջընթաց է ապրել: Մինչ այդ իրանցի ըմբիշները օլիմպիական խաղերում հաղթող չեն ճանաչվել, իսկ  Բաբալարյանից հետո  ծնվել են լուրջ հաջողությունները:

Հենց միայն Լոնդոնի օլիմպիական խաղերում ոսկե մեդալակիր  են դարձել Իրանի միանգամից երեք ըմբիշներ: Երախտապարտ այդ տղաները հաջողության գործում  գնահատել  են երևանցի մասնագետի ներդրումը:

Արտերկրում երկամյա  գործուղումից հետո  Բաբալարյանը վերադարձել է հայրենիք և ստանձնել մարզաձևի Հայաստանի երիտասարդական հավաքականի ավագ մարզչի ղեկը

Ի դեպ, նոր պաշտնում նա փոխարինել է իր անձնական մարզչին ՝ Էդվարդ Սահակյանին և կայացման գործում  չափազանց բարձր է գնահատում սիրելի ուսուցչի դերը:

Հայաստանի ազգային օլիմպիական կոմիտեն  շնորհավորում է նորանշանակ գլխավոր մարզչին, ցանկանում բեղմնավոր գործունեություն  և նրանից ակնկալում  նոր, առավել խոսուն հաղթանակներ: