Այսօր առավոտյան  Սոֆիայից  տունդարձի ճամփա ընկավ  Հայաստանի բռնցքամարտի երիտասարդական հավաքականը:  Մենք հասցրինք կոլեկտիվի  ընդհանուր վիճակի մասին  կարծիք ստանալ  ավագ մարզիչ  Վազգեն Բադալյանից:  Ասաց, որ առաջնությունում  մրցանակակիր դարձան հիմնականում  բռնցքամարտի դասական որակներ ունեցող, տեխնիկական հարուստ զինանոցով օժտված մարզիկները:  Մեր տղաները  նույնպես լավ տպավորություն թողեցին:

Մերոնց մասնակցությամբ մենամարտերի ընթացքին հետևած  մասնագետներն ու մարզասերները ականատես եղան և կվկայեն, որ  նույնիսկ  ձախողված մեր  սաները  վերջին ՝ երրորդ ռաունդում  ավելի լավ աշխատեցին:  Նշանակում է, որ ընդհանուր և  հատուկ ֆիզպատրաստականությունը մերոնց  չի դավաճանել:  Իսկ ահա  տեխնիկական խոտանը աչք էր ծակում: Հայկական բռնցքամարտի դպրոցի  հաջողության հիմքում, բազմաթիվ հատկանիշներից բացի, ակնառու է եղել  արագությունը և տեխնիկատակտիկական հատկանիշների առատությունը:  Այդ ամենով, ավաղ,  այսօր հպարտանալ չենք կարող: Բռնցքամարտ ոտք  դրած պատանուն  պետք է մարզիչները ազատություն տան, զգան նրա նախասիրությունները և դրանց  հիման վրա ստեղծեն, կառուցեն մեր  ազգային դպրոցի  հարստությունը:

Սոֆիայի ռինգում մեր  ներկայացուցիչների  գործողություններում  տոկոս չկազմեցին կրկնակի գրոհները, երկհարկանի  ու եռահարկ  հարվածաշարերը:  Խոտանը նկատելի էր նաև պաշտպանական հարցերում: Այս  և անհրաժեշտ այլ  հմտությունների տիրապետող բռնցքամարտիկները պետք է գործուղվեն  հավաքական, որի մարզչական խորհրդի անդամները պետք է լուծում տան տակտիկական հարցերին: Իսկ մեր պարագայում  ընդամենը մի քանի  հավաքներով ու մրցուղերթներով  անհնարին է , բացառվում է շտկել թերությունները:  Պետք է կարևորել տեղերում աշխատող մարզիչների գործը  և գնահատել  անձնական մարզիչների աշխատանքի արդյունավետությունը:

Հաջողությունը զարգացնելու հիմքեր կան: Հնարավոր  է  եկող տարի բարելավել արդյունքները: Հաշվի առնենք, որ մեր երիտասարդները հիմնականում 17 տարեկան են: Հաջորդ մրցաշրջանում, նպատակային մարզումների պարագայում, նրանց դիրքերն ավելի կամրանան բոլոր առումներով, ներառյալ ՝ հաղթանակների քանակով:

Առաջնությունում Հայաստանի հավաքականն ունեցավ մեկ  ոսկե և երկու արծաթե մեդալակիր:  Հաղթողի պատվին արժանացավ  Էրիկ Իսրայելյանը / 60 կգ, մարզիչ ՝ Արմեն Հակոբյան  /: Փոխչեմպիոն դարձան  վանաձորցի  Արես Հակոբյանը / 60 կգ, մարզիչ ՝ Գևորգ Կոստանյան /  և երևանցի  Համլետ Ադամյանը / 80 կգ, մարզիչ Ռոբերտ Պետրոսյան/:

Մեր թիմի հաջողության հիմքում անտարակույս մեծ է վանաձորցի մասնագետներ,  ավագ մարզիչ, վաստակավոր մարզիչ Վազգեն Բադալյանի և նրա օգնական  Արթուր Ուլիխանյանի դերը: